Os participantes na actividade de fútbol sala que forman parte das escolas deportivas municipais do Concello de O Pino tomaron parte en dúas xornadas amistosas contra os equipos do Concello de Trazo, co obxectivo de reactivar a actividade competitiva intermunicipal suspendida por mor da pandemia.
A primeira xornada celebrouse no Concello de Trazo o pasado 2 de abril, onde competiron sete equipos de rapaces/zas en idade escolar entre ambos municipios. A segunda xornada desputouse a fin de semana do 30 de abril, e nela xuntáronse máis de 60 deportistas distribuídos en catro equipos de alevíns e tres equipos de biberóns entre ambos os dous concellos, dos cales 31 representaban ao Concello do Pino.
Por outra banda, o 7 de maio celebrábase en Cedeira o campionato provincial escolar de bádminton integrado no programa XOGADE da Secretaría Xeral para o Deporte de Galicia. Nesta competición, cinco deportistas do Concello do Pino enfrontáronse a outros/as clasificados/as das zonas de Ferrol, A Coruña e Noia. Todos eles cumpriron magnífico papel. Cómpre destacar a actuación de Andrea Vilar Ordóñez, quen acadou o título de subcampioa provincial na categoría benxamín femenino.
