Na categoría absoluta as persoas participantes deberán percorrer 8 quilómetros e en menores de 6 anos uns trescentos metros ||
Haberá premios en metálico para os tres primeiros clubes federados, e trofeos para os primeiros de cada categoría ||
Os escolares recibirán unha medalla ||
A XVI Carreira Pedestre Popular Concello de O Pino bateu o seu récord de asistencia na última edición, celebrada en 2019, con 610 corredores de todas as idades.
O Concello de O Pino organiza o vindeiro domingo día 22 a XVIII Carreira pedestre popular cun percorrido de 8 quilómetros para a categoría absoluta e de 300 metros no caso de menores de seis anos. A primeira saída darase ás 10.00 horas na praza de Forcarei (Arca), onde tamén está situada a meta.
Organizada baixo o control técnico da Federación Galega de Atletismo, esta proba pertence ao VIII Circuíto de carreiras populares da Deputación da Coruña.
Na proba poderán participar atletas federados e non federados e haberá unha soa clasificación conxunta. O control da proba estará a cargo do Comité de Xuíces da Federación Galega de Atletismo.
A inscrición deberá facerse na web carreirasgalegas.com (neste enlace) antes das 23.59 horas do xoves 19 de maio. A recollida de dorsais será na secretaría técnica (situada na praza de Forcarei) 30 minutos antes da saída. O regulamento da proba pódese consultar na mesma paxina web da inscrición.
A saída da categoría absoluta (maiores de 18 anos) será ás 10.00 horas, e as seguintes iranse facendo de xeito consecutivo ata ás 12.10, cando comezarán a correr as persoas participantes menores de seis anos.
O Concello entregará trofeo para os tres primeiros e as tres primeiras clasificadas das diferentes categorías absolutas, e para o primeiro home e muller das categorías Sub-8 ata Sub-18, entre outras premiacións. Os trofeos non serán acumulativos agás os correspondentes aos e ás atletas locais. Haberá medallas para todas as persoas participantes nas categorías escolares entre Sub-6 e Sub-12.
No caso dos clubs federados establécense premios en metálico de 150, 100 e 50 euros para os tres primeiros, tanto en categoría masculina como feminina.
