Casa do Concello – Contacto

A CASA CONSISTORIAL

A Casa Consistorial localízase na Rúa do Concello en Pedrouzo- Arca.

Trátase dun edificio moderno, de tres alturas e cuberta mixta. O principal motivo da aparencia da fachada principal é a potente liña de balcón que aparece na segunda planta. Predomina o movemento volumétrico que artella as diferentes pezas. A porta principal, situada nun dos laterais, conta cun soportal que se forma ao retranquear a liña de fachada na planta baixa uns tres metros. O voado da cuberta sobre o balcón principal, que leva tras de si toda a liña de cornixa, contribúe a destacalo de maneira decisiva.

Na planta baixa está situado o Departamento de Servizos Sociais, ademais do Xulgado de Paz. Na primeira planta sitúanse o resto de servizos: atención ao público, contabilidade, urbanismo, deportes, desenvolvemento local, turismo, secretaría e alcaldía. Na planta superior atópase o salón de plenos e a aula de informática municipal, ademais dunha aula de formación.

CONTACTO CO CONCELLO

HISTORIA DA CASA CONSISTORIAL

O rexistro que asinou a mediados do século XIX, Pascual Madoz, situábanos o edificio municipal, sen espazo físico propio, na freguesía de San Vicenzo do Pino. Posteriormente trasladouse ao actual albergue de Santa Irene, e posteriormente a un edificio localizado en Arca.

Este último, trátase dun inmoble situado fronte ao actual albergue de Arca, hoxe en día edificio de correos, e construído nos seus inicios por Luis Santiago Seoane e María López, pais do coñecido e polifacético galeguista Luis Seoane, e fillo predilecto do Concello desde 2008.