O público que acudiu onte ao teatro na casa de cultura de Arca acabou escachando de risa ante as ‘Urxencias’ do Club de Maiores de Boqueixón, que amosaron sobre o escenario as súas dotes como artistas e un sentido do humor que xa quixeran moitos.
O persoal sanitario do particular hospital que construíron os maiores de Boqueixón tivo que facer fronte ás situacións máis disparatadas na sala de urxencias do centro. Dende a ‘francesa’ que quería estirar o seu “cutís” para acudir a unha cea de alto copete, ata a señora de 93 anos que lle ensinaba o bastón ao médico cando este poñía reparos a someter a esta paciente, xa non tan moza, a unha inseminación in vitro. “Veño buscar un fillo sen home, deses que hai agora”, díxolle a paciente ao médico dando un bastonazo enriba da mesa. E claro, logo posou o que pasou, ao cabo duns meses chega a señora do caribe coa súa filla xa xubilada e os xemelgos froito daquela visita ao hospital.
A todo iso engadíase o afán das señoras da limpeza por sonsacarlle e desconfiar dun magullado presentador de cámara oculta da televisión, que foi a Urxencias en busca dunha cura e tivo que saír por patas. Na sala de espera tamén se deron cita algunha que outra veciña con pouco que facer e moitas ganas de falar, ou a que ía alí coa súa filla para tela entretida. Tampouco faltaron os lios amorosos, como os intentos de reconciliación que protagonizou o marido dunha das doutoras, que intentaba unha reconciliación sen percatarse de que apareceu en Urxencias acompañado pola súa amante, o que estivo a piques de provocar unha liorta de coidado.
E así, entre risa e risa, broma e broma, posou unha hora, na que os actores e actrices do Club de Maiores de Boqueixón demostraron que se pode facer teatro con máis de oitenta anos, sempre que se poña vontade e traballo.
Album de fotos no Facebook do Concello (preme aquí)
