-
O Sergas fixo as probas ás outras 6 persoas que traballan nas dependencias municipais e deron negativo ||
-
A veciñanza que precise atención urxente do Concello pode chamar á casa de cultura ao teléfono 981 511 065 ||
O alcalde de O Pino decidiu pechar a casa consistorial durante 10 días, ata o vindeiro 13 de novembro, despois de que tres persoas que traballan nas oficinas da praza do concello deran positivo en covid-19 ao longo da pasada fin de semana. O Sergas citou as outras 6 persoas que traballan nestas dependencias para facer as probas do coronavirus, dando todas elas negativo.
O alcalde consultou a medida cos portavoces dos tres grupos políticos presentes na Corporación, que apoiaron o peche da casa consistorial como medida para preservar a saúde de todos os traballadores e evitar a propagación da pandemia.
Os veciños e veciñas do Pino que precisen resolver algunha xestión urxente durante estes dez días poderán chamar á casa de cultura (teléfono 981 511 065), dende onde tentarán atender as súas demandas, na medida do posible. As instalacións do centro sociocultural Luis Seoane seguirán funcionando con normalidade, xa que só se pechan as dependencias da casa consistorial situada na praza do Concello.
Durante a fin de semana tres persoas que traballan nestas dependencias deron positivo en covid-19 e permanecen illadas nos seus domicilios seguindo as indicacións das autoridades sanitarias. Unha deu positivo o venres, outra o domingo, e a terceira o luns. O alcalde contactou onte coas autoridades sanitarias, que citaron esta mesma mañá ás outras seis persoas que traballan na casa consistorial para facer as probas da covid-19. Todas elas deron negativo.
O alcalde, Manuel Taboada, pídelle comprensión á veciñanza polos inconvenientes que lles poida causar o peche das oficinas da casa consistorial. “Tomamos esta decisión para preservar a saúde de todas as persoas que traballan nestas dependencias, así como para o resto da veciñanza que se puidera achegar ata as oficinas municipais. Queremos evitar a propagación da pandemia, e poder facer unha desinfección integral das instalacións”.
