Ata o venres, persoas maiores de 55 anos con cita previa poden recibir atención gratuíta de audioloxía, podoloxía e estimulación da memoria ||
Antón Acevedo, acompañado polo alcalde Manuel Taboada, conversou con algunhas das persoas que acudiron hoxe ||
Esta unidade móbil voltará ao Pino dúas veces máis ata finais do vindeiro ano ||
Dende que se puxo en marcha o servizo, en marzo, atendéronse máis de 20.000 persoas en Galicia, 5.600 delas na Coruña ||
O director xeral de Maiores e Atención Sociosanitaria, Antón Acevedo, e o alcalde de O Pino, Manuel Taboada, visitaron esta mañá a unidade móbil do programa Coidados porta a porta situada xunto ao centro de saúde de Arca. Alí sinalou que esta iniciativa leva atendidas a máis de 20.000 persoas de toda Galicia desde a súa posta en marcha no pasado mes de marzo, das que 5.600 persoas son da provincia da Coruña.
Acevedo e Taboada estiveron acompañados polas concelleiras Mercedes Vázquez e Eva Varela, e pola educadora familia Cruz Toande. Durante a visita conversaron coas personas que estaban agardando e saían das consultas, e tamén cos profesionais que atenden dentro da unidade móbil, que estará en Arca ata o venres 30 de setembro. Segundo informaron os profesionais, a veciñanza ten practicamente reservadas todas as citas dispoñibles.
Segundo informou o director xeral, a unidade móbil volverá ao Pino outras dúas veces antes de finais do ano 2023. Para ser atendido en calquera dos autobuses de Coidados porta a porta, cómpre solicitar cita previa nos teléfono 622 748 283 ou 623 546 992, ou ben a través do seguinte enderezo electrónico coidadosportaaporta.politicasocial@xunta.gal.
Mediante esta iniciativa, o Goberno galego achega aos maiores de 55 anos atención gratuíta en podoloxía, audioloxía e estimulación da memoria. A da Coruña é a que rexistra ata o momento un maior número de beneficiarios con máis de 5.600 persoas.
Por medio de oito autobuses que percorrerán todos os concellos galegos agás as sete cidades, a Consellería de Política Social e Xuventude facilita coidados médicos e de saúde en xeral preto dos fogares das persoas maiores, evitándolles desprazamentos fóra da súa contorna e posibilitando que poidan seguir vivindo alí onde prefiran.
