- O xefe territorial de Mobilidade comunicoulle a decisión ao alcalde nunha reunión a última hora de onte //
- Vaise retrasar 20 minutos a saída da liña cara a Santiago pola mañá, e 10 minutos o regreso ao mediodía //
O xefe territorial de Infraestruturas e Mobilidade da Xunta na Coruña, José Antonio Álvarez Vidal, comunicoulle ao alcalde do Pino, nunha xuntanza que mantiveron a última hora da tarde de martes, que o Goberno galego vai modificar os horarios da liña de autobuses que cubre o traxecto O Pino-Santiago para adaptalos ás horas de entrada e saída dos institutos en Compostela.
A Xunta vai modificar o horario do autobús de primeira hora cara a Santiago, adiantando uns 15 minutos o seu paso polas paradas no Pino (de Arca sairá ás 08.15 horas), para chegar a capital de Galicia sobre as 09.45. Deste xeito o alumnado poderá chegar a tempo ás clases sen ter que esperar unha hora, como pasa actualmente. O autobús que parte de Santiago ao mediodía vai retrasar a súa saída uns 10 minutos (partirá da estación de autobuses ás 14.40 horas), para que ao alumnado lle dea tempo de rematar as clases e poida chegar a xantar sobre as tres da tarde.
O alcalde, Manuel Taboada, solicitara o luns unha reunión urxente co director xeral de Mobilidade para expoñerlle o prexuízo que os horarios actuais lle ocasionan o alumnado do Pino que estuda nos institutos de Santiago. Dende que comezaron as clases o pasado venres, pola mañá, ou chegaban tarde ou tiñan que esperar unha hora a que comezaran as clases. A mediodía, non chegaban a Arca ata as catro da tarde.
Na reunión de onte, celebrada a última hora da tarde na Coruña, José Antonio Álvarez Vidal explicoulle a Manuel Taboada que os novos horarios entrarán en vigor o 25 de xaneiro. Esta demora débese a que é necesario modificar toda a programación dos horarios dos autobuses na aplicación informática.
O alcalde do Pino agradeceulle ao representante da Xunta a axilidade para arranxar este problema, ocasionado pola nova adxudicación da concesión de transportes de viaxeiros por estrada que entrou en vigor o pasado 23 de decembro.
