- Atendendo a outra proposta súa,o Concello habilita un buzón na Casa da Cultura para que nenas e nenos deixen as súas cartas ||
- Tamén dispoñen da dirección de correo electrónico nadal@opino.gal para escribrirlles á Papá Noel, aos Reis Magos ou ao Apalpador ||
- Nenos e nenas pódenlle escribir unha carta a Papá Noel, ao Apalpador e aos Reis Magos utilizando o modelo adxunto a esta nova ||
Papá Noel, o Apalpador e os Reis Magos puxéronse en contacto co Concello do Pino para que tranquilizásemos a todos os nenos e nenas. Estaban preocupados porque as autoridades sanitarias, co obxecto de frear o avance da pandemia da covid-19, non deixan que se reúna moita xente. A Papá Noel gústalle visitar o cole, recibir aos pequenos e pequenas no seu salón, conversar con todos, darlles unha aperta. E, no caso dos Magos de Oriente, escoitar as súas peticións no polideportivo de Arca. Pero este ano non vai ser posible. Ademais, tanto Papá Noel como os Reis son bastante maiores e xa sabemos que, se se contaxian de coronavirus, poden poñerse moi maliños.
Pero ocorréuselles unha solución para non deixar de estar con toda a cativada do Pino. Viron como, durante o confinamento, nos reuníamos con videoconferencias e agora queren facer o mesmo. No Concello pareceunos unha grande idea. Por iso, puxemos os medios para que xa o vindeiro luns día 21, o alumnado de infantil e máis o de primeiro e segundo de primaria do CPI Camiño de Santiago poida falar con Papá Noel por videoconferencia.
Outra petición que lle fixeron Papá Noel, o Apalpador e os Magos ao Concello foi que nos asegurásemos de que lles chegaban as cartas de todos os nenos e nenas do Pino, só faltaba que neste ano tan atípico se perdese algunha polo camiño.
Atendendo a súa solicitude, habilitamos a dirección de correo electrónico nadal@opino.gal para que lle poidades contar todo o que queirades e, por suposto, pedir (con moita educación) os regalos que vos gustaría que vos trouxeran. Comprometéronse a contestalas todas. Tamén puxemos á disposición de toda a cativada un buzón no Centro Sociocultural Luis Seoane de Arca (na Casa da Cultura) para que poidades deixarlle o correo postal. Para escribirlle, se queredes, podedes usar o modelo de carta que está ao final desta nova.
Non tedes que preocuparvos por como chegarán na noite de Noteiboa nin pola de Reis. Farano igual que sempre: Papá Noel voando polo ceo co seu trineo máxico capitaneado polo seu inseparable amigo Rudolph; o Apalpador, a pé e cargando co seu saco de carbón; e os Reis Magos, sobre os seus inesgotables camelos.
As autoridades xa lles asinaron os salvocondutos que lles permiten traspasar fronteiras e saltar peches perimetrais. Pensade que, como adoitamos estar durmidos cando chegan e apenas hai contacto, van poder seguir cumprindo coas peticións tal e como fan dende hai moitos, moitos anos.
Só é preciso que manteñades a ilusión.
