Manuel Taboada: “Ningún partido político en Galicia utiliza as redes sociais institucionais dos organismos oficiais para facer política” ||
Óscar Vilar considera unha extralimitación de funcións que se bloqueara o seu perfil e o do PSdeG no Facebook do Concello ||
A proposta do alcalde, os concelleiros renunciaron a cobrar as dietas por asistencia a este pleno ||
O Pleno do Concello de O Pino rexeitou esta mañá, cos votos en contra do grupo de goberno popular e a favor da oposición, as peticións formuladas polo grupo socialista na Corporación en relación ao uso das redes sociais institucionais do Concello. O alcalde, Manuel Taboada, adiantoulle ao voceiro socialista, Óscar Vilar, que se ían desbloquear o seu perfil e o do PSdeG do Pino na paxina de Facebook oficial do Concello, “pero se continúa facendo un mal uso de ditas redes volverá quedar bloqueado”.
Durante o debate, o alcalde recordoulle ao voceiro socialista que leva varios anos facendo mal uso das redes sociais institucionais do Concello, que “están para informar á veciñanza” das iniciativas municipais, “non para xerar debate político entre os diferentes partidos”.
Nesta liña, Manuel Taboada asegurou que “ningún partido político en Galicia usa as redes sociais institucionais dos organismos oficiais para facer política”. E puxo como exemplo que nin o PSdeG-PSOE fai publicacións no Facebook da Xunta de Galicia, nin o PP as fai nas redes sociais da Deputación da Coruña, nas do Concello da Coruña nin nas do Concello de Santiago, “como ven facendo vostede dende hai dous anos no Facebook do Concello do Pino”, díxolle ao portavoz socialista municipal. “Bloqueámolo tras recibir queixas de veciños porque estaba facendo un mal uso das redes sociais do concello”, aseguroulle o rexedor.
O grupo socialista pediu un pleno extraordinario (celebrado esta mañá) ante o que cualificou como “clara extralimitación de funcións” por parte do alcalde, por ter bloqueado na páxina de Facebook do Concello os perfís do voceiro socialista, do propio PSOE do Pino e de varios veciños e veciñas.
Na proposta de resolución, os socialistas pedían que se desbloquearan ditos perfís, un uso non partidista das redes sociais municipais e que, para bloquear alguén nas redes, había que adoptar antes un acordo plenario ao respecto. Óscar Vilar díxolle ao alcalde que había que aceptar ás críticas, ao que este respondeu que no Facebook do Concello hai moitos veciños que alaban e outros que critican ao goberno municipal e sempre se respectaron todas as opinións.
A proposta do grupo socialista foi rexeitada cos votos en contra do grupo de goberno do PP (6 votos) e a favor da oposición (4). Taboada lembroulle a Óscar Vilar que se desbloquearían o seu perfil e o do grupo socialista e adiantoulle que “se seguen facendo un uso partidista das redes sociais municipais, volverán quedar bloqueados”. Así mesmo, lembrou que só hai un veciño bloqueado na páxina de Facebook do Concello do Pino, porque “quería utilizar o perfil institucional para facer publicidade do seu negocio e iso non o imos permitir”, concluíu.
Antes de iniciar a sesión, e a proposta do alcalde, todos os concelleiros renunciaron a cobrar as dietas por asistencia a este pleno extraordinario.
