O Concello do Pino participa no proxecto Camiños de coñecemento e experiencia, xunto con outros 16 municipios da Coruña e Pontevedra. Trátase dun programa de formación universitaria dirixido ás persoas maiores de 50 anos e desenvolverase durante cinco días do vindeiro mes de setembro no centro sociocultural Luis Seoane, en Pedrouzo.
Varios temas culturais e científicos centran as cinco xornadas formativas. O ciclo ábrese o día 21 cun seminario sobre a construción das personaxes no teatro a cargo de Beatriz Porrúa Refojo, e segue o 22 cunha charla sobre a Universidade de Santiago na historia de Galicia, a cargo do profesor Anxo Rodríguez Lemos. Beatriz Porrúa volve o día 23 para impartir un obradoiro de teatro, mentres que a profesora de Ciencias Políticas Ana Moure Soengas será a encargada dos relatorios dos días 24 e 25, sobre introdución á criminoloxía e a análise de pegadas dactilares, respectivamente. As sesións levaranse a cabo entre as catro e media e as seis da tarde.
A matrícula nas xornadas é gratuíta. Para inscribirse hai que dirixirse ao departamento de Servizos Sociais do Concello do Pino. Camiños de coñecemento e experiencia forma parte do IV Ciclo Universitario da Universidade de Santiago, entidade que organiza o programa co apoio da Xunta de Galicia e da Deputación da Coruña. Na edición de 2020 articipan os concellos do Pino, A Estrada, Arzúa, Boiro, Lalín, Lousame, Melide, Muros, Noia, Ordes, Outes, Padrón, A Pobra do Caramiñal, Rianxo, Ribeira, Teo e Vedra.
