O alcalde de O Pino, Manuel Taboada, e a concelleira de Cultura, Eva Varela, os únicos con dedicación exclusiva no goberno municipal, decidiron doar un 30% do salario do mes de abril aos Servizos Sociais do concello para colaborar coas familias máis vulnerables pola crise do coronavirus COVID-19.
Con esta decisión, que se adoptan seguindo a recomendación do presidente da Xunta, dende o equipo de goberno de O Pino quérese contribuír a apoiar o “importante labor que dende o departamento de Servizos Sociais municipais se está a facer entre a veciñanza, con seguimento telefónico constante a aquelas familias máis vulnerables para axudarlles a cubrir as súas necesidades básicas, e o labor que están a desenvolver co Servizo de Axuda no Fogar”, explica Manuel Taboada.
Durante as últimas semanas, dende o Concello de O Pino estivéronse repartindo máis de 2.000 quilos de alimentos entre as familias con menos recursos do municipio, unha iniciativa na que o concello colaborou co Banco de Alimentos Rías Altas.
Nesta liña, tanto o alcalde como a concelleira de Cultura recordan que todas aquelas persoas do Pino que estean a pasar momentos de dificultade pódense poñer en contacto co Concello, no teléfono 981 511 002, “e dende Servizos Sociais tratarán de axudalos, dentro das nosas posibilidades, levándolle medicinas ou alimentos, ou contactando cos supermercados para que lles poidan achegar a súa casa produtos básicos”, como recordaba o alcalde na mensaxe que lle dirixiu á veciñanza o pasado 26 de marzo
