O espírito do Entroido no Pino foi onte máis forte que a choiva, e non impediu que un cento de persoas se subira ao escenario para participar no concurso de disfraces que organizou o Concello, no que repartiu máis de 1.700 euros en premios. Houbo parodias para todos os gustos, dende dous enterros e dúas sobre o Sergas, ata drag queens, pasando polos Simpson, indios, unha granxa de pitos, astrounautas, vellas, unha reunión mundial de sogras e ata persoaxes cinematográficos como o cazapantasmas, a Máscara ou Cruella de Vil (album de fotos no facebook do Concello, neste enlace).
Durante máis de dúas horas os participantes estiveron desfilando e actuando, nuns casos debaixo da carpa montada na praza do concello, e que onte se fixo imprescindible para resgardarse algo da choiva, e noutros, subindo ao escenario. E para combater o frío, o alumnado de cuarto da ESO do CPI Camiño de Santiago tiña unha mesa con chocolate quente para quen quixera colaborar coa excursión de fin de curso.
E foi precisamente a parodia que organizou o alumnado de cuarto da ESO a que, despois dunha longa deliberación, convenceu ao xurado para que lle dera o primeiro premio na categoría de comparsas a ‘O enterro de Benito’, un cortexo fúnebre moi especial no que non faltou a música en directo, batería incluída, de parte dos asistentes deste particular funeral, que ata se puxeron a bailar arredor do féretro.
O premio ao disfrace máis orixinal recaeu nos ‘Trolls do Pino’, que encheu de colorido a praza do concello, algo que tamén fixeron os ‘Indios das neves’ coas súas rechamantes vestimentas, e as ‘Drag runners’, que subiron ao escenario para facer estiramentos sobre unha plataformas que non sempre lles permitía manter o equilibrio, e que lles valeu o premio ao mellor grupo. ‘Os Simpson’ chegaron á praza do Concello co señor Burns metido no maleteiro do seu coche tuneado, e levaron o premio á mellor carroza, unha aportación que regalarían máis tarde para contribuír coa excursión de fin de curso de cuarto da ESO.
No apartado de parellas, o humor dos ‘Jorrillas’, que apareceron nun cortacéspede con remolque e os seu consello final de que hai que “ser lejales” serviulles para levar o primeiro premio neste apartado.
‘O astronauta’, que chegou ao Pino con pouco gas para facer despegar o seu cohete, e ‘A velliña’, á que lle costaba moito dar un paso, mereceron, segundo o xurado, o primeiro e segundo premio na categoría individual dun concurso de disfraces que estivo moi animado.
Antes da entrega de premios, na que participaron membros do equipo de goberno, déronse os agasallos aos participantes no concurso de carteis de Entroido que organizou un ano máis o Concello. Nesta ocasión, os premiados foron: a aula de 6º de Infantil do CPI Camiño de Santiago; Paula Villamor Martínez, na categoría de 6 a 8 anos; Carla Fandiño Iglesias, na de 9 a 11 anos, e Jacobo García Ríos, na categoría de ESO, de 12 a 17 anos.
Máis fotos no facebook do Concello, neste enlace).
