A Consellería de Medio Ambiente vai aportar algo máis de 150.000 euros para que o Concello de O Pino complete o soterramento dos contedores do lixo en Arca coa finalidade de mellorar a imaxe que ofrece a capital municipal aos milleiros de peregrinos que cada ano pasan por ela, e tamén dotar de mellores servizos á veciñanza, sobre todo aos hostaleiros, reducindo ademais os malos olores que soen provocar os contedores de superficie no verán.
A inversión total do proxecto ascende a 214.975,51 euros, dos que a consellería aporta 150.552 e o concello 64.422 euros, para instalar catro novas illas de contedores soterrados na avenida de Santiago, o tramo da N-547 que atravesa Arca. As obras acometeranse este ano, e permitirán instalar dúas illas a cada marxe da estrada, co que se completará un dos proxectos que o Concello tiña para mellorar a imaxe de Arca.
O convenio de colaboración foi asinado entre o alcalde, Manuel Taboada, e a conselleira de Medio Ambiente, Ánxeles Vázquez, e vénse sumar ás fases anteriores na que xa se instalaron seis illas de contedores soterrados. Os últimos colocáronse o ano pasado cunha inversión de 45.000 euros financiados pola Secretaria Xeral de Turismo, que están situados enfronte da avenida da Igrexa. As novas illas colocaranse dende este punto ata o final da recta, en dirección Santiago.
Segundo o convenio asinado, o Concello será o responsable de redactar o proxecto e poñer a disposición da Consellería os terreos necesarios. Pola súa banda, dende a Xunta de Galicia contratarase a obra e financiarase na súa maior parte. Una vez rematadas e recibidas as obras, o Concello será o responsable do seu mantemento futuro.
Unha vez remate esta fase, levaranse investido case medio millón de euros na colocación de contedores soterrados en Arca. Nunha primeira fase, financiada tamén pola Consellería de Medio Ambiente, o investimento acadou os 200.000 euros para colocar cinco illas (catro na avenida de Santiago e outra na praza do Concello) durante o ano 2017. O ano pasado colocouse outra illa máis na avenida de Santiago, cun investimento de 45.000 euros, aos que agora se sumarán outros 215.000 euros para completar esta actuación con outras catro zonas de contedores soterrados.
Segundo o alcalde, Manuel Taboada, este proxecto ten como finalidade “mellorar a imaxe que damos aos peregrinos e, ao mesmo tempo, evitar a presenza de insectos arredor das terrazas dos establecementos de hostalaría, mellorando así a salubridade e evitando os malos cheiros que hai arredor dos colectores de superficie, sobre todo no verán”. A intención do goberno municipal é agora ampliar a colocación de contedores soterrados noutras rúas da capital municipal na que hai máis afluencia de turistas.
