Máis don cento de exemplares de raza piñeira poderanse contemplar durante a fin de semana
Espectáculos de lume, malabares, seres mitolóxicos, numerosos oficios, carrusel a pedais, un barco pirata e a exhibición de cetrería enchen de colorido a praza de Forcarei
Mañá será o día grande da Festa do Galo Piñeiro e Mostra Cabalar
O Pino está a vibrar esta fin de semana coa celebración da Feira Celta, que onte pola noite congregou a numerosos veciños e visitantes na praza de Forcarei para contemplar tanto as exhibicións de cetrería como o espectáculo de lume. Un ambiente que continuará durante toda a xornada de hoxe e ao que se lle suma a feira de galos e galiñas piñeiras vivas, que este ano se celebra por primeira vez durante dous días. Mañá será o día grande coa celebración da XX Festa do Galo Piñeiro e Mostra Cabalar, con numerosas actividades dende ás dez da mañá.
O trío TreeFolk empezou onte a animar coa súa música a Feira Celta na praza de Forcarei, que foi collendo vida coas exhibicións de cetrería, os espectáculos de malabares de Humans no Limits, a visita dos faunos e dos seres mitolóxicos para rematar cunha espectáculo de acrobacias e de lume que recibiu numerosos aplausos.
A Feira Celta volve contar este ano con atractivos para todas as idades. Dende a exposición de diferentes oficios, como os cesteiro, zapateiros, teares, creación de cencerros e de corcho, ata postos de artesanía e de alimentación para todos os gustos. Para os máis pequenos hai xogos tradicionais, unha barca pirata e tamén un carrusel a pedais, ademais dun taller de maquillaxe, que onte xa probaron algúns e algunhas para asemellarse ás bolboretas.
O mercado continuará aberto pola mañá ata as dúas e, dende as seis da tarde, encherase de novo de actividades co pasarrúas musical (18.30), a visita dos personaxes fantásticos (19.15), a exhibición de cetrería (20.15) o minotauro e a diosa Jade (22.00) para pechar ás 22.45 co espectáculo Phyros, de lume e acrobacias.
Feira de Galos Piñeiros vivos
E mentres tanto, xa dende primeira hora, nunha carpa situada preto da praza de Forcarei, a Asociación de Galo Piñeiro (Agalpi) e o concello empezaban a inscribir aos galos e galiñas desta raza típica de O Pino nun concurso que, segundo o presidente da asociación, Daniel Fernández, espera xuntar máis de 100 exemplares. Por primeira vez nos 20 anos de historia da festa do Galo Piñeiro, o concurso de galos vivos vaise celebrar durante dous días e non terá premios en metálico.
Un xuíz nacional “de acreditado prestixio”, segundo Daniel Fernández, será o encargado de elixir aos mellores exemplares de galos e galiñas piñeiras en cada unha das tres modalidades do concurso: aperdizado, asalmonado e branco. Os dous mellores galos e galiñas de cada modalidade recibirán un diploma acreditativo. “Aos criadores interésanos máis o diploma, acreditar o pedigrí e a calidade dos nosos exemplares, que o premio en metálico”, explicaba o presidente de Agalpi. Durante toda a tarde de hoxe e mañá pola mañá, o xuíz analizará un a un todos os animais que se presentan ao concurso. Os premios en metálico resérvanse
Mañá: Pregón, xantar popular e maxia
O día grande desta XX Festa do Galo Piñeiro chegará mañá, domingo. As 10.00 abrirase a segunda xornada de galos e galiñas piñeiras, a unha da tarde haberá degustación gratuíta do rei da festa na praza de Forcarei, que seguirá moi animada con todos os espectáculos da Feira Celta.
As 14.00 o xornalista da TVG Terio Carrera lerá o pregón desta vixésima edición da Festa do Galo e darase a coñecer o nome dos gañadores da feira de galos e galiñas piñeiras vivos, para continuar cun xantar popular no que participarán unhas 1.500 persoas, que pola tarde poderán gozar co espectáculo ‘A maxia no Camiño’.
O Mago Antón, Mago Richard e Kiko Pastur ofrecerán cinco pases do seus espectáculo a todas as persoas que queira gozar da boa maxia. Serán ás 16.00, 17.00, 18.00 19.00 e 20.00 horas.
Mostra cabalar
E de xeito paralelo a esta intensa xornada, dende ás 10.00 horas celebrarase tamén a vixéxima edición da Mostra Cabalar, na que se repartirán 4.000 euros en premios nas 17 categorías organizadas, entre as que destaca o galardón especial FAÍSCA ao mellor cabalo ou éoga de pura raza española nado e criado en Galicia, que protagonizará o cartel da XXI Mostra Cabalar.
A xornada pechará co espectáculo ecuestre “Único” a cargo da Escuela de Equitación El Centauro, de Valladolid, que, dende as sete da tarde, deleitará aos alí presentes con pases de marcha, capotes e saltos, entre outras moitas habilidades ecuestres.
Album de fotos no facebook do Concello de O Pino (neste enlace)
