Con 94 e 95 anos foron dos asistentes con máis idade a unha festa que xuntou a unhas 900 persoas na área recreativa da Madalena ||
O concerto da Banda de Música de Arca abriu o programa e o duo Eva e Camilo encargouse de animar a sobremesa ||
Os homenaxeados, sentados, pola esquerda: Juan Vaamonde, Abelardo García, María Caneda e Alfredo Mosquera
As persoas maiores do Pino demostraron ter ganas de participar na vixésimo quinta edición dunha festa coa que o Concello quere agradecer e recoñecer o traballo que desenvolveron durante toda a súa vida. Antes do xantar de confraternidade, o alcalde, Manuel Taboada, entregoulle sendos recoñecementos a catro das persoas de máis idade presentes na Xuntanza dos Nosos Maiores, que naceron entre 1927 e 1929.
Nesta edición, as placas conmemorativas e as homenaxes foron para María Caneda Pereira, veciña de Ferreiros (Cimadevila, Frechazo Primeiro), que cumprirá 96 anos o vindeiro mes de setembro; para Juan Vaamonde Buján, da parroquia do Pino (Leborán Grande), de 95 anos; para Abelardo García Blanco, natural de Cerceda, de 94 anos, e para Alfredo Mosquera Barreiro, de Budiño (Pazos de Abaixo), que acaba de soprar as 94 velas o pasado mes de maio. Ademais dos recoñecementos que lles entregou o equipo de goberno, recibiron uns agarimosos aplausos de todos os asistentes á festa.
Na área recreativa da Madalena déronse cita preto de 900 persoas, veciños e veciñas do Pino maiores de 60 anos, para participar nunha das tradicionais celebracións que organiza o Concello. A Banda de Música de Arca, dirixida por Andrés Pérez ofreceu na carballeira da Madalena un concerto moi aplaudido. Despois, o cura de Ferreiros Jesús Rial oficiou a misa campestre, como ven sendo tradición nesta celebración.
O alcalde, Manuel Taboada, destacou “o traballo realizado polas persoas homenaxeadas e por todas as presentes”, que axudaron a facer do Pino o que hoxe é. “Esta festa quere ser un agradecemento e un recoñecemento a todo o que conseguistes con tanto sacrificio”.
O restaurante A Magdalena, de Castrofeito, volveuse encargar do menú, e mobilizou a corenta persoa para preparar e servir empanada, polbo e carne ó caldeiro, co que os asistentes puideron repoñer forzas antes dunha animada sobremesa. Mentres uns conversaban e lembraban algunhas anécdotas, outros puxéronse a bailar e facer algo de exercicio ao ritmo da música do dúo formado por Eva e Camilo, que animaron o baile.
Album de fotos na páxina de Facebook do Concello do Pino (neste enlace)
