O rexedor considera que se trata dun servizo clave que dotará dunha maior capacidade de resposta ante emerxencias a municipios rurais como o de O Pino ||
A Xunta e a Deputación ratificaron este martes os seus compromisos financeiros e aportarán tres millóns de euros ao proxecto ||
Manuel Taboada participou este mércores, xunto aos rexedores dos nove municipios implicados, na xuntanza convocada no Concello de Santiago para abordar o futuro do parque comarcal de bombeiros ||
O alcalde de O Pino, Manuel Taboada, participou este mércores na xuntanza convocada no Concello de Santiago para abordar a posta en marcha do futuro parque comarcal de bombeiros. “Agardamos que, despois de esperar máis de vinte anos, desta vez o parque comarcal de bombeiros se poña en marcha o antes posible”, dixo Manuel Taboada, en sintonía co resto de alcaldes da comarca que asistiron á reunión.
Tras máis de vinte anos de espera, a Xunta de Galicia e a Deputación da Coruña ratificaron este martes os seus compromisos financeiros e aportarán tres millóns de euros ao proxecto: dous para as obras das futuras instalacións e un millón de euros anual para os custos de persoal. Pola súa parte, o Concello de Santiago asume a contratación do persoal, así como a licitación do servizo e a contratación das obras para a construción do parque.
“Estamos moi satisfeitos deste novo impulso ao parque comarcal, e agardamos que despois de máis de 20 anos de espera se poña en marcha canto antes un proxecto tan necesario para a nosa comarca. O parque comarcal é clave para dotar de seguridade aos nosos veciños e veciñas”, afirma Manuel Taboada. Con respecto á futura localización, con dúbidas por parte do Concello de Santiago á hora de continuar ou non co emprazamento previsto en Salgueiriños, o alcalde de O Pino insta a “buscar a mellor situación posible para contar cun servizo que ofreza unha resposta o máis rápida posible ante as posibles emerxencias que xurdan nos nosos concellos”.
Ademais de co alcalde de O Pino, Manuel Taboada; o encontro promovido pola alcaldesa de Santiago, Goretti Sanmartin, contou coa presenza dos alcaldes e alcaldesas de Ames, Blas García; Teo, Lucía Calvo de la Uz; Vedra, Carlos Martínez; Boqueixón, Ovidio Rodeiro; Val do Dubra, Diego Díaz; e Trazo, Josefina Suárez. Por cuestións de axenda non asistiu o alcalde de Brión, Pablo Lago.
A comarcalización do servizo de bombeiros permitirá atender a nove concellos cunha extensión de máis de 900 quilómetros cadrados e unha poboación de 180.000 habitantes.
Trátase dun servizo clave que dotará dunha maior capacidade de resposta ante emerxencias a municipios rurais como o do Pino.
Todas as administración implicadas ratificaron esta semana o seu compromiso de ter asinado o convenio ao longo deste ano.
