-
A praza do Concello buliu coa animada participación de grandes, pequenos e pequenas nas actividades para toda a familia //
-
Papá Noel recibiu as cartas coas peticións dos nenos e das nenas //
O Concello do Pino deulle esta tarde á benvida ao Nadal co acendido da árbore e a celebración dunha gran festa chea de actividades (obradoiros, xogos, teatro…) e apta para todos os públicos, aínda que os grandes protagonistas da xornada foron os rapaces e as rapazas do municipio. Non faltou á cita a visita dun dos personaxes máis queridos polos nenos e nenas nestas datas: Papá Noel.
A Praza do Concello, escenario da celebración, converteuse ao longo da tarde nun ir e vir de xente, especialmente familias con crianzas, desexosas de participar nos diferentes obradoiros e xogos programados polo Concello para dar a benvida ao Nadal. Os asistentes puideron elaborar adornos de Nadal (que despois se levarían para a casa) ou estampar a súa propia camiseta con motivos destas datas e mesmo maquillarse ou levar algún tatuaxe marcado. Os máis pequenos e pequenas tamén tiveron a oportunidade de facer a súa carta de Papá Noel.
Papa Noel, que asistía ao acendido das luces da árbore de Nadal, recibiu as peticións de cada unha das nenas e dos nenos presentes na festa e que quixeron contarlle os seus desexos. Moitos pais e nais aproveitaron para tomar unha fotografía e inmortalizar o momento.
A diversión estivo asegurada cos xogos en familia e unha divertida xincana na que participaron grandes, pequenos e pequenas e que agudizou o sentido da deportividade. O público asistente tamén gozou coa divertida aposta de Títeres Babaluva, Feira de sementes.
O alumnado de 4º da ESO do Pino aproveitou a celebración para instalar un posto con lambetadas e recadar deste xeito fondos para a excursión de fin de curso.
