Comezará ás 21.00 horas e contará coas actuacións de Pili Pampín, Lucía Pérez, La Ocaband, Pepo Suevos e Manuel Manquiña e será emitido en directo por Anove TV ||
Un percorrido pola historia da música galega e dos Camiños de Santiago é o fío condutor do espectáculo Camiñantes e cantantes que este domingo se poderá ver en directo na praza do Concello de O Pino dende ás nove da noite. Este formato da canle Anove TV estará protagonizado por La Ocaband, Pili Pampín, Lucía Pérez, Pedo Suevos e Manuel Manquiña.
Inspirado no Camiño de Santiago, Camiñantes e cantantes é un formato novidoso que aborda unha importante parte da cultura galega a través da música e o humor. O espectáculo, previsto inicialmente no campo da festa de Arca, cambia de localización para a praza do Concello.
Tal como recordaron o alcalde do Pino, Manuel Taboada, a concelleira de cultura, Eva Varela, e o produtor Carlos Alleres, o día da súa presentación, o musical Camiñantes e cantantes recolle todos os temas que foron e son interpretados nas verbenas de Galicia.
Manuel Taboada e Eva Varela consideran “fundamental apoiar estes formatos”, porque “a conservación do noso patrimonio cultural é unha obriga de cara ás xeracións máis novas”. Taboada Vigo incidiu na necesidade de manter vivas as tradicións máis enxebres da comarca, e aclarou que a verbena é unha parte moi importante da festa galega, e agradeceu o esforzo do produtor en retratala neste espectáculo.
Camiñantes e cantantes poderase ver en directo a través de Anove TV (cóllese no canal 9 da TDT) ou a través da retransmisión en estreaming dende o canal de Youtube de Anove TV (neste enlace).
