As prazas cubriranse por rigoroso orde de inscrición
Trátase dunha proposta que mestura gastronomía con música, maxia, humor e ritmo
Saaabor!, espectáculo gastronómico para público familiar, chega ao centro sociocultural Luis Seoane do Pino o vindeiro sábado 27 de febreiro ás seis da tarde. As entradas son gratuítas pero deben reservarse por causa das restricións de aforo impostas para frear o avance da pandemia.
Saaabor! é unha proposta de Culturaactiva para persoas de todas as idades que emprega como fío condutor o mundo da gastronomía para mesturar música, maxia, humor e ritmo e animar á participación do público.
Félix Rodríguez e Fran Rei dan vida a dous recoñecidos chefs que ofrecen platos para todos os gustos elaborando un saboroso menú para toda a familia, no que presentan tanto comidas máis prácticas e sinxelas como outras máis elaboradas en o que non faltan tampouco o viño e a sobremesa.
Para acceder ao auditorio será necesario reservar entrada, dende hoxe mesmo, chamando ao teléfono 981 511 065 (de 10.00 a 14.00 horas de lunes a venres) ou manando un correo ao enderezo electrónico cultura@opino.gal.
As prazas iranse cubrindo por rigorosa orde de inscrición. Entregaranse un máximo de catro entradas por cada reserva previa, tendo en conta que as persoas que soliciten máis dunha entrada deberán ser conviventes.
O día do concerto, as persoas con reserva deberán presentarse no centro sociocultural cun mínimo de quince minutos de antelación (antes das 17.45 horas). De non facelo, esas prazas quedarán a disposición de persoas que non dispoñen de reserva e iranse ocupando por orde de chegada.
