Entre mércores e domingo, percorrerán o Camiño en bici polas mañás para axudalos en ruta //
Polas tardes, atenderanos no Punto de Atención ao Peregrino que se habilita fronte ao albergue público do Pedrouzo //
Voluntarios da Cruz Vermella e o Concello do Pino colaborarán durante o mes de agosto para prestarlles asistencia aos peregrinos que pasan polo noso municipio facendo a última etapa dos camiños francés, primitivo ou do norte.
A partir deste mércores, día 4, e ata o día 29 de agosto, os voluntarios da Cruz Vermella asistirán aos peregrinos que atravesan o Concello do Pino, que, con 18 quilómetros de Camiño Francés, é o que conta en Galicia cunha maior extensión desta ruta xacobea. Trátase da variante máis transitada; abonda dicir que foi a escollida por máis da metade (un 55%) das 22.833 persoas que se achegaron á tumba do Apóstolo durante o pasado mes de xullo.
A asistencia da Cruz Vermella prestarase de dúas formas. Polas mañás, os voluntarios pecorrerán o Camiño de Santiago no Pino en bicicleta e axudarán en ruta a aqueles peregrinos que o precisen. Xa pola tarde, entre as 15.00 e as 19.00 horas, atenderanos no Punto de Atención ao Peregrino. Este punto localizarase nun local que cede o Concello en plena ruta xacobea no Pedrouzo, a carón de Correos e fronte ao albergue público.
