O vicepresidente da Xunta, Alfonso Rueda, participou no Pino nun percorrido desde Arca ata O Amenal para conmemorar esta experiencia piloto ||
A iniciativa levouse a cabo no Camiño Francés entre agosto e setembro e coa previsión de estender o programa a máis rutas xacobeas en 2022 ||
Patrullas de socorristas percorreron a ruta en bicicleta para prestar asistencia, xunto con postos fixos e un vehículo itinerante de apoio ||
O equipo de voluntarios da Cruz Vermella atendeu a un total de 1.200 peregrinos durante os meses de xullo e agosto a través do programa ‘Contigo no Camiño’, desenvolvido grazas á colaboración entre a entidade social coa Xunta de Galicia e coa aseguradora Mapfre para dar resposta a situacións de emerxencia no Camiño de Santiago. O vicepresidente primeiro da Xunta, Alfonso Rueda, participou este mércores xunto á presidenta autonómica de Cruz Vermella, Carmen Colmeiro, e ao alcalde do Pino, Manuel Taboada, nun acto no que fixeron balance do programa ao seu peche, ao tempo que percorreron un tramo do Camiño entre Arca e O Amenal.
Así, ao longo de agosto e setembro atendeuse a 1.200 peregrinos, tanto con asistencia de primeiros auxilios como información sobre rutas, albergues e situación e horarios doutras instalacións. Nestes dous meses, patrullas móbiles e socorristas percorreron en bicicleta case 5.000 quilómetros do Camiño Francés para prestar polas mañás acompañamento, asistencia e asesoramento aos camiñantes, mentres que polas tardes recibían a mesma atención desde os puntos fixos de asistencia instalados no Pino, en Portomarín e no Monte do Gozo. En total, este servizo supuxo máis de 450 horas de actividade por parte do operativo integrado por 5 socorristas e 1 coordinadora. O dispositivo completouse cun vehículo de apoio itinerante.
Coa experiencia piloto deste programa no Camiño Francés, a Xunta reforzou a seguridade e, por tanto, a mensaxe de que facer o Camiño neste Xacobeo 21-22 é seguro. Unha vez avaliados os resultados desta primeira proba a previsión é estender a iniciativa en 2022 a máis extensión do Camiño Francés ou mesmo a outras rutas tendo en conta a reactivación do Camiño tamén a nivel internacional.
