Valentina, caracterizada de pennywise, levou o premio ao mellor disfraz //
A creatividade quedou patente no certame de cabazas //
A elección dos mellores disfraces pechou o sábado no pavillón municipal a Festa de Samaín organizada polo Concello do Pino. Logo de que Valentina, caracterizada como pennywise, se alzara co premio, o xurado decidiu outorgarlle ademais un galardón especial a Azul, polo seu chamamento a coidar o planeta ao disfrazarse de serea morta cuberta de plástico.
A creatividade e a orixinalidade quedaron patentes tamén no concurso de decoración de cabazas, fallado con anterioridade. Quedou gañadora ‘O home do saco’, coa ‘Fridakahlobaza’ en segundo posto e a colorida ‘A festa dos mortos’ en terceira posición.
Varias ducias de nenas e nenos achegáronse ao polideportivo para participar nos obradoiros, no roteiro terrorífico e, sobre todo, mover o esquelete (nunca mellor dito) coa disco móbil. As cancións máis coñecidas e animadas dos últimos anos fixeron bailar a peques e maiores e celebráronse as mellores coreografías.
Cansos e contentos, os asistentes gozaron de tres horas de diversión xunto a tres monitoras e o picadiscos e volveron vivir unha festa que foi case coma as de antes.
