Os participantes no programa universitario de maiores Camiños de coñecemento e experiencia recibiron os seus certificados de diplomados sénior no acto de clausura celebrado onte no Colexio de Fonseca. En total, 14 veciños e veciñas do municipio do Pino tomaron parte nesta iniciativa, que achega o ensino universitario a maiores de 50 anos de 21 concellos da Coruña e Pontevedra. A Universidade de Santiago promove este proxecto para a democratización do coñecemento, co apoio da Xunta de Galicia e da Deputación da Coruña.
O director xeral de Maiores e Persoas con Discapacidade, Ildefonso de la Campa, subliñou a importancia deste programa, que permite formar e ampliar coñecementos “abrindo as portas da Universidade a persoas que non tiveron esta oportunidade na súa mocidade”. Manuel Canabal, tenente de alcalde do Pino, actuou en representación do Concello nun acto de clausura que reuniu a máis de duascentas persoas no Salón Noble de Fonseca. Ao remate do mesmo, os participantes asistiron a un concerto ofrecido pola Real Filharmonía de Galicia no Auditorio de Galicia.
Camiños de coñecemento e experiencia forma parte do IV Ciclo Universitario da USC. Desenvolveuse no Pino en cinco xornadas formativas, nas que se trataron varios temas culturais, científicos e de patrimonio. Todas elas foron impartidas por profesorado da Universidade de Santiago. Como complemento formativo das xornadas teóricas, o alumnado participou tamén en diferentes visitas, como as realizadas ao punto limpo do Concello do Pino ou ao Arquivo da Catedral de Santiago.
Podes ver máis fotos no Facebook do Concello do Pino.
