Uns 250 aboados fixeron uso desta instalación, atendida por catro socorristas en quendas de mañá e tarde //
Nenos e nenas de 4 a 14 anos participaron nos cursos de natación nos meses de xullo e agosto //
Esta é a derradeira semana na que se poderá gozar da piscina ao aire libre de Lameiro (O Pino), aberta desde o pasado 1 de xullo. Ademais dun bo número de persoas que acudiron de xeito puntual, 250 aboados utilizaron a instalación, que tamén acolleu cursos de natación.
A piscina estival de Lameiro comeza a recuperar niveis de ocupación similares aos dos anos previos á pandemia. Se antes de 2020 os abonos chegaban aos 400, o ano pasado quedaron en 140 e este foron xa 250. Hai que ter en conta que a ocupación do recinto non pode superar o 75% debido ás estritas medidas de hixiene postas en marcha para combater a pandemia de covid-19. Este verán, os abonos custaron 6€ para menores de 16 anos e 12€ para maiores (12€ e 24€ para persoas non residentes). Tamén se puxeron en marcha bonificacións coma o abono familiar, cunha cota inicial de 15€ para pai e nai, 6€ para o primeiro fillo, 3€ para o segundo e o terceiro e sucesivos gratis. A entrada diaria, opción elixida por moitas das persoas que acudiron, custou 3,60€.
A instalación estivo atendida durante estes dous meses por catro socorristas en quendas de mañá e tarde. Un deles foi contratado polo Concello, ao abeiro do programa Fomento do emprego e mellora da empregabilidade da Consellería de Emprego e Igualdade; mentres que os outros tres contaron co cofinanciamento da Deputación Provincial da Coruña.
Entre as actividades programadas durante o verán na piscina de Lameiro destacaron os cursos de natación, que se impartiron de luns a xoves de 12.30 a 13.15h. Os luns e os mércores estiveron dedicados ao grupo de iniciación, composto por dez nenos e nenas de 4 a 9 anos, que deron as súas primeiras brazadas, con manguitos e churro no caso dos máis pequenos, xa coa táboa os maiores. Cada grupo ocupou a súa propia zona da piscina, atendido por un socorrista, para realizar exercicios e xogos adaptados ao seu nivel. Os martes e os xoves foron para o grupo de perfeccionamento, con sete nenos e nenas de 9 a 14 anos.
Album de fotos en Facebook: Cursos de natación na piscina de Lameiro
