- O goberno municipal fixo un investimento de 12.705 euros para mercar os aparatos con fondos propios
- Colocaranse na casa consistorial, colexio, casa da cultura, unitaria de Gonzar, campo de fútbol de Reboredo e os dous polideportivos
O alcalde de Pino fixo entrega dos sete desfibriladores adquiridos polo goberno municipal cun investimento de 12.705 euros e que se van colocar nas instalacións públicas do municipio. O pasado martes, traballadores municipais, persoal do CPI Camiño de Santiago e representantes da SD O Pino recibiron un curso de formación para saber manexar estes aparellos que poden salvar vidas.
Manuel Taboada e a concelleira de Cultura, Eva Varela, entregáronlle onte as máquinas a representantes do colexio público, da SD O Pino e ao técnico de deportes. Con este reparto de desfibriladores, o alcalde quere converter en espacios cardioprotexidos as principais instalacións públicas do municipio, que estarán dotadas de sistema que axudan a facer reanimación cardiopulmonar en caso de que algunha persoa sufra un percance nestes edificios ou nas súas inmediacións.
O sete desfibriladores mercados polo Concello van estar localizados na casa consistorial, no colexio, na escola unitaria de Gonzar, no centro sociocultural Luis Seoane, no campo de fútbol de Reboredo e nos dous polideportivos municipais (Reboredo e Lameiro).
