O Concello de O Pino tomou hoxe a decisión de suspender as escolas deportivas e as actividades deportivas para adultos durante un mes, mentres se manteñas as novas restricións que afectan ao municipio debido a pandemia da covid-19, e que entrarán en vigor esta medianoite.
A orde da Consellería de Sanidade publicado o pasado mércores do DOG establece no punto 5 do anexo II, no caso de deporte non federado, que en instalacións e centros deportivos poderase realizar actividade deportiva de forma individual, sen contar, se é o caso, o monitor, sen contacto físico. Dende diferentes concellos, entre eles o do Pino, mantívose unha reunión con representantes da Xunta para aclarar se era factible manter as escolas deportivas municipais e as actividades deportivas para adultos, que xa se viñan realizando en grupos reducidos. A resposta do Goberno autonómico foi que habería que cumprir coa norma de sanidade.
Dada esta situación, e a imposibilidade de poder manter as escolas e as actividades deportivas con sesións individuais, dende o Concello adoptouse a decisión de suspender as mesmas mentres duren as restricións que entran en vigor esta medianoite (ás 00.00 horas do sábado, día 7), e que se manterán ata ás 15 horas do 4 de decembro.
Nese momento volverase a analizar a situación. O alcalde agarda que para entón se poidan retomar de novo tanto as actividades deportivas para adultos, como as escolas deportivas para os menores de idade.
Polo que respecta ás actividades culturais e aos cursos que se imparten na casa de cultura (costura, bolillos e bordado ao aire), estas séguense celebrando.
