O alcalde Manuel Taboada pon de relevo a Ruta como a “maior industria cultural e de impacto social” do municipio //
O director da S.A. de Xestión do Xacobeo Ildefonso de la Campa acompaña a delegación arxentina na súa visita //
Jorge Luciano Montoya e David Urreta, responsables do departamento de Integración Rexional da provincia de Córdoba (Arxentina), visitaron esta mañá o Concello de O Pino para coñecer máis de preto as medidas de desenvolvemento, organización e promoción do Camiño de Santiago. O alcalde, Manuel Taboada, recibiunos na casa consistorial, e puxo de manifesto a importancia do Camiño como “a maior industria cultural e de impacto social tanto deste coma doutros concellos”. O director da S. A. de Xestión do Xacobeo, Ildefonso de la Campa, acompañou á delegación na súa visita.
Montoya e Urreta, impulsores dun proxecto de peregrinación ao santuario do cura Brochero en Córdoba, amosaron particular interese na xestión do Camiño no municipio, que conta co tramo máis longo da peregrinación en Galicia. Ao longo desta visita institucional, o alcalde explicou que esta Ruta “é unha rede moi delicada. Moitas poboacións pequenas se benefician do Camiño e debe ser prioritario traballar para potencialo. Neste eido formamos parte da Mancomunidade galega do Camiño Francés, que nos axuda a ter unha vía de comunicación sempre aberta cos nosos veciños”. Para Taboada é clave a coordinación entre concellos para manter o mecanismo en perfecto funcionamento.
Os representantes arxentinos apreciaron os consellos e bos desexos do alcalde, iniciando deste xeito unha estreita relación de colaboración. Ao remate da reunión os representantes intercambiaron agasallos, recibindo Montoya e Urreta unha estatuíña de peregrino e outorgando un presente similar ao primeiro edil.
Manuel Taboada recalcou a importancia do intercambio de experiencias neste tipo de xuntanzas. “Que un concello pequeno como o noso chame a atención internacional apunta a unha proxección moi ampla”, engadiu.
