O concello de O Pino conxuntamente cos concellos de Boqueixón, Vedra e Frades, dende o mes de outubro están levando a cabo o Programa Integrado de Emprego denominado “Empregat 2.0” cofinanciado pola Consellería de Traballo e Benestar da Xunta de Galicia.
Este proxecto que está dirixido a incrementar a empregabilidade das persoas desempregadas dos concellos participantes, combina accións de diversa natureza, tales como información, orientación e asesoramento, formación, práctica laboral, prospección de empresas e intermediación laboral, rematará o 31 de xullo de 2015. Nel participan un total de 60 persoas desempregadas dos catro concellos, das que a metade son persoas perceptoras de prestacións ou subsidios por desemprego.
O compromiso adquirido polos concellos é a inserción laboral de polo menos o 40% dos 60 desempregados/as partipantes no programa, ben mediante a contratación por conta allea ou iniciando unha actividade por conta propia ou formando parte como socios traballadores ou de traballo dunha cooperativa ou sociedade laboral.
Dende que comezou o programa, os alumnos/as recibiron formación de Alfabetización Dixital, Hixiene Alimentaria para manipuladores de alimentos, Prevención de Riscos Laborais, Operador de Aparatos Elevadores e manexo da Plataforma Virtual de formación “Empregat 2.0” pola que o alumno/a pode navegar durante toda a duración do proxecto, co fin de mellorar as capacidades curriculares e incrementar a súa incorporación ao mercado laboral.
Actualmente estanse a deseñar novas accións formativas, entre elas, a de Atención, Orientación e Servizo ao Cliente que se impartirá nos vindeiros días.
