Poden participar maiores de 8 anos e adultos, que deberán formar equipos de entre 2 e 5 persoas ||
En dúas horas e media deberán superar diversas probas, orientarse con mapa e percorrer ata 6 km para acadar os maior número de puntos posible ||
Celébrase o día 21 con saída e chegada á praza de Forcarei ||
Aberta a inscrición nesta actividade organizada polo Concello en colaboración con Territorio Comanche ||
A Concellaría de Cultura abre hoxe o prazo de inscrición para participar en Pino-Aventura, unha actividade que se vai celebrar o vindeiro 21 de maio dirixida a maiores de 8 anos e adultos que fomenta o xogo en equipo, o exercicio físico e a agudeza mental. As persoas participantes deberán formar equipos de entre dúas e cinco persoas para superar diversas probas (físicas ou de coñecemento), orientarse cun mapa e percorrer unha distancia de ata seis quilómetros para localizar unha serie de puntos de control ou balizas.
Nun máximo de dúas horas e media os equipos participantes deberán conseguir o maior número de puntos posibles. Organizado polo Concello en colaboración coa empresa Territorio Comanche, os equipos deciden libremente a orde de busca e o ritmo a seguir. Trátase dun xogo estratéxico no que a toma de decisións e, sobre todo, o traballo en equipo son fundamentais para acadar o éxito.
Os equipos participantes en Pino-Aventura iniciarán a proba ás 10.30 da mañá do vindeiro sábado 21 de maio dende a praza de Forcarei. A organización facilitaralle a cada grupo un mapa (con toda a información necesaria para orientarse); unha folla de descrición das balizas (as zonas de control) e dos puntos que vale cada unha. Un tríptico, no que cada equipo deberá apuntar as respostas das probas de coñecemento e o seu paso polas balizas, e un bolígrafo completarán o material necesario para participar.
Cada equipo deberá levar polo menos un teléfono móbil, para estar sempre localizado, auga e roupa e calzado cómodo para andar ou correr.
Aberta a inscrición
As persoas interesadas deberán formar equipos de entre 2 e 5 participantes. Poden anotarse a partir do 3 de maio na casa de cultura (presencialmente ou chamando ao teléfono 981 511 065) ou enviando un correo electrónico ao enderezo cultura@opino.gal. A inscrición pecharase unha vez se complete a cota máxima de participantes. Podes descargar a ficha de inscrición en Pino-Aventura no documento adxunto
Para anotarse é necesario facilitar os seguintes datos: nome do equipo, teléfono de contacto, nome completo e data de nacemento de cada un dos integrantes. Os menores de 12 anos deberán aportar tamén unha autorización da nai, pai ou titor.
Pódese competir en dúas categorías: Pequen@s Piñeir@s, reservada para os grupos no que haxa, polo menos, un menor de 12 anos; e Explorador@s Piñeir@s para os equipos nos que todos os seus membros sexan maiores desa idade.
Ao rematar a proba haberá un punto de avituallamento na praza de Forcarei para que as persoas participantes poidan repoñer forzas.
