Mañá xoves, día 19, está prevista a visita de Papá Noel ao Concello do Pino. Ao longo da mañá, Santa Claus desprazarase ata a escola infantil Galiña Azul e á unitaria de Gonzar para saudar aos máis pequenos. A partir da unha do mediodía, o alumnado de Educación Infantil e de 1º e 2º de Primaria do CPI Camiño de Santiago acudirá ao Salón de Papá Noel na Casa da Cultura. Alí poderán trasladarlle as súas peticións e recordarlle o ben que se portaron ao longo do ano.
Por outra banda, o sábado 21 celebrarase a II Festa de Nadal cunha dobre cita: os máis pequenos poderán gozar coa xincana de xogos no polideportivo de Reboredo a partir das cinco da tarde e os maiores están convocados a unha Quedada Tecedora na Casa de Cultura á mesma hora. Os xogos propostos están especialmente pensados para estas datas de festa: encesto na árbore de Nadal, dálle aos renos de Rudolf ou pesca de bastonciños son exemplo disto. As familias interesadas en participar na Festa de Nadal deberán entregar as follas de inscrición que se repartiron na escola ou ben descargar a ficha no enlace anexo a esta nova.
Mentres, aqueles aos que lles guste a calceta ou o ganchillo están convocados a participar nunha iniciativa pioneira, a Quedada Tecedora, que busca recuperar e transmitir vellas tradicións ao tempo que se comparten experiencias e sabedoría sobre estas técnicas. Como fin de festa, maiores e pequenos poderán participar nunha merenda con chocolate e biscoitos antes de asistir a un espectáculo sorpresa para toda a familia.
Ademais, o Concello de O Pino fai un chamamento á veciñanza para colaborar co VI Nadal Benéfico, unha iniciativa posta en marcha para recoller alimentos non perecedoiros e produtos de hixiene persoal e de limpeza que o resto do ano se distribúen entre as familias con menos recursos de acordo coa Cruz Vermella ou co departamento de Servizos Sociais. Aquelas persoas interesadas en colaborar poden depositar as súas doazóns no caixón situado na Casa da Cultura ata o 31 de xaneiro.
Preme no enlace para ver en vídeo o Salón de Papá Noel.
