O equipo Porcos bravos, na categoría de Explorador@s piñeir@s, e as Ninjas exploradoras, na de Pequen@s piñeir@s, proclamáronse vencedores da segunda edición do Pino Aventura, celebrada o sábado 20 de maio na contorna da área recreativa da Tarroeira. Na proba participaron máis de 30 persoas, distribuídas nun total de dez equipos.
O Pino Aventura é un xogo de orientación e estratexia que combina exercicio ao aire libre con habilidades e agudeza mental. A finalidade do mesmo é divertirse ao tempo que se coñece mellor o territorio do municipio.
Entre os participantes había familias e grupos de amigos cunha característica común: o desexo de pasalo ben. Orientándose cun mapa, debían localizar o maior número posible do total de 18 balizas ocultas e superar con éxito as probas que nelas había. Para iso contaban cun tempo total de dúas horas e media.
Os Porcos bravos alzáronse coa vitoria na categoría de Explorador@s piñeir@s (adultos); acadaron un total de 675 puntos e finalizaron a proba nun tempo de 1 hora e 51 minutos. En segunda posición situáronse Sin rumbo (590 puntos), seguidos por High Ground (469 puntos) e Aventureiras comanches (420 puntos).
Pola súa banda, as Ninjas exploradoras empregaron as dúas horas e media que duraba a competición en lograr os 395 puntos que lles deron a vitoria na categoría de Pequen@s piñeir@s. O podio completárono os Pokemons (368 puntos) e os Perdidos (325 puntos), mentres que Centolo Man finalizaron cuartos, seguidos por Exploring Minions e Doraemon na quinta e sexta posición respectivamente.
A actividade estivo organizada polo Concello do Pino en colaboración con Territorio Comanche e coa Xunta de Galicia.
No documento adxunto poden consultarse as clasificacións detalladas, así como as solucións das probas especiais.
O álbum de fotografías da saída da proba, publicado na páxina de Facebook do Concello do Pino, pode verse premendo nesta ligazón.
