Os equipos Porcos bravos, na categoría de exploradores piñeiros, e Anfibi-landia, na de pequen@s piñeiros, foron os gañadores do Pino-Aventura, a xornada de orientación e busca celebrado o pasado sábado en Arca, organizada pola Concellaría de Cultura do Pino e Territorio Comanche.
Na primeira edición do Pino-Aventura participaron máis de medio cento de persoas distribuídas en 15 equipos. Debían superar diferentes probas e conseguir puntuación localizando balizas e facendo actividades en puntos extratéxicos distribuídos polo casco urbano de Arca e os arredores do Camiño de Santiago.
Despois de dúas horas e media de competición, a parella que formaba o equipo Porcos bravos conseguía sumar 650 puntos, os mesmos que Les Rates, pero gañaron a competición ao ser o equipo máis rápido.
Na categoría pequen@s piñeiros, o trío de Anfibi-landia acumulaba 437 puntos, cinco máis que o segundo clasificado.
No documento adxunto podes ver as clasificacións da xornada e tamén un pequeno dossier da primeira edición de O Pino-Aventura. O vídeo resumo da xornada pódelo ver neste enlace.
