Esta mañá celebrouse na área recreativa da Magdalena, en Castrofeito, a fase comarcal do Campionato escolar de campo a través, que superou todos os rexistros anteriores ao reunir a 1.150 nenos e nenas nas categorías de benxamín ata cadete. Deles, 11 dos preto de 70 atletas do CPI Camiño de Santiago do Pino conseguiron clasificarse para a fase intercomarcal, que se vai disputar no parque Eugenio Granell de Santiago o 18 de xaneiro do ano que ven. A proba estivo organizada pola Secretaría Xeral para o Deporte, a través do programa Xogade, en colaboración coa Fundación Deporte Galego e a Federación Galega de Atletismo.
Ana Mecías Rey e Pablo Sánchez Mella foron os gañadores da categoría benxamín, mentres que Fernando Franco García quedou segundo en cadetes. Foron os tres mellores clasificados entre os representantes do Pino, que conseguiron outras oito prazas máis para participar en Santiago no mes de xaneiro.
Nesta fase comarcal, clasificábanse os catro mellores equipos e os oito primeiros corredores en cada unha das categorías, benxamín, alevín, infantil e cadete, tanto masculino como feminino.
Das probas celebradas ata o momento, a de hoxe foi a máis numerosas das organizadas no municipio do Pino, con 1.150 nenos inscritos de diferentes colexios da comarca, que chegaron en máis de 25 autobuses ata a área recreativa da Magdalena.
Album de fotos no Facebook do Concello de O Pino (neste enlace)
