O Concello de O Pino ten en marcha a sexta edición do Nadal Benéfico para recoller alimentos non perecedoiros e produtos de hixiene persoal e de limpeza que o resto do ano se distribúen entre as familias con menos recursos de acordo coa Cruz Vermella ou co departamento de Servizos Sociais. Para estas festas, a Concellaría de Cultura ten programada un amplo abano de actividades para pequenos e maiores, que inclúen a visita ao salón de Papá Noel, a segunda Festa de Nadal e unha quedada tecedora e a cabalgata dos Reis Magos polas parroquias, ao que se suma o tradicional concerto da Banda de Música.
No ano 2014 o Concello de O Pino poñía en marcha unha campaña para que veciños e visitantes puidesen colaborar con aquelas familias do municipio que pasan por momento de dificultade, aportando alimentos non perecedoiros, produtos de hixiene e de limpeza, que se depositaban nun caixón situado na Casa da Cultura ata o 31 de xaneiro –aínda que se seguen admitindo en calquera data–, e que logo se gardan no almacén municipal.
O departamento de Servizos Sociais municipais ou a propia Cruz Vermella son os que logo solicitan algúns deste produtos para entregarlle ás familias que pasan por momentos de dificultades durante o resto do ano. Latas de conservas, froita ou comida enlatada, aceites, potitos para os bebés e que tamén serven para as persoas maiores; compresas, cueiros, xabón ou aceite son algúns dos produtos que se poden depositar para colaborar co Nadal Benéfico do Pino.
A comida preparada sempre é unha boa opción, porque algunhas familias que precisan destes alimentos hai veces que non teñen nin con que cociñar. “Hai moitos produtos máis aló do arroz ou a pasta que se poden doar, e tamén durante o resto do ano. Houbo quen trouxo un saco de patacas recentemente arrincadas, coas que axudamos a varias familias”, sinala a concelleira de Cultura, Eva Varela.
Visita ao salón de Papá Noel
E coma todos os anos no Pino, o último xoves antes da vacacións de Nadal, o vindeiro día 19, o alumnado máis novo da escola infantil A Galiña Azul, da unitaria de Gonzar e do CPI Camiño de Santiago recibirá a visita de Papa Noel. Mellor dito, Santa Claus desprazarase ata á Galiña Azul e a unitaria de Gonzar, e os nenos e nenas de educación Infantil e de 1º e 2º e Primaria do CPI irán visitar o salón de Papá Noel na Casa da Cultura. Alí poderán trasladarlle as últimas peticións e recordarlle o ben que se portaron o resto do ano.
Festa de Nadal e Quedada tecedora
As familias que o desexen poden colaborar co Nadal Benéfico o vindeiro sábado, día 21, cando acudan cos seus fillos e fillas a segunda edición da Festa de Nadal, que se vai organizar a partir das 17.00 horas no polideportivo de Reboredo, onde poderán gozar dunha xincana de xogos no que haberá tiro e encesto na árbore de Nadal, dálle aos renos de Rudolf, pesca dos bastonciños e moitas máis sorpresa.
Ao rematar, todas as persoas participantes poderán achegarse ata a Casa de Cultura para participar nunha gran merendola a base de chocolate e biscoitos antes de participar nun espectáculo sorpresa para toda a familia.
E mentres a cativada o pasa en grande no polideportivo, na Casa da Cultura está convocada unha Quedada Tecedora para todas e todos os amantes da calceta e do ganchillo para poder recuperar e transmitir vellas tradicións. “Quen non lembra a súa avoa, nai ou tía cun novelo de lá sobre todo nas tardes de inverno?”, pregúntase Eva Varela. A idea desta iniciativa é a de “compartir experiencias e sabedoría sobre o mundo da calceta e do ganchillo”, engade a concelleira.
As persoas interesadas en participar nesta quedada están citadas ás cinco da tarde, coas súas labores de calceta ou ganchillo, para sentarse arredor dunha mesa, acompañadas dun café, e pasar dúas horas compartindo afeccións.
Concerto de Nadal e comitiva dos Reis Magos
As actividades destas festas continuarán o sábado 28 co tradicional concerto da Banda de Música de Arca, e rematarán o 5 de xaneiro coa visita que a comitiva dos Reis Magos farán a todas as parroquias do Pino, antes de recibir aos nenos e nenas no polideportivo de Reboredo (Arca) a partir das sete e media da tarde.
