O alcalde cree que o Tribunal Administrativo de Contratación Pública de Galicia daralle a razón ao Concello, como xa fixo en Coristanco e Vimianzo ante recursos similares ||
Manuel Taboada aclara que o Servizo de Axuda no Fogar seguirá prestándose con normalidade como ata o de agora ||
O Pleno da Corporación do Pino aprobou onte por unanimidade suspender cautelarmente o proceso de licitación do Servizo de Axuda no Fogar (SAF) como decretou o Tribunal Administrativo de Contratación Pública da Comunidade Autónoma de Galicia (TACP) mentres non resolve o recurso presentado pola Asociación Galega de Empresas de Axuda no Fogar (AGESAF) contra os pregos de contratación. O alcalde agarda que o tribunal acabe dándolle a razón ao Concello, como xa fixo en Coristanco e Vimianzo en recursos similares ao presentado no Pino. Manuel Taboada quixo tranquilizar á veciñanza, asegurando que o “Servizo de Axuda no Fogar seguirase prestando con normalidade como ata o de agora, non se vai interromper a súa prestación. O recurso só afecta ao proceso de licitación do vindeiro contrato”, dixo
Segundo explicou o alcalde, Manuel Taboada, o recurso presentado por AGESAF solicita que nos pregos de contratación se teña en conta o incremento do IPC para o ano 2023 e 2024, “unha medida que o propio Tribunal xa rexeitou tanto en Coristanco coma en Vimianzo alegando que esa medida é contraria á lexislación vixente”. O alcalde aclarou que os pregos económicos “xa contemplan o incremento do IPC ata o ano 2022. As valoracións económicas dos pregos están feitas segundo o convenio colectivo”, engadiu Taboada.
O pasado 4 de xaneiro, O TACP notificaba a recurso de AGESAF, dáballe ao Concello do Pino dous días hábiles para presentar alegacións e solicitaba a suspensión cautelar do proceso de licitación. O 9 de xaneiro, remitíanse as alegacións do Concello, aprobadas por resolución da alcaldía.
Durante o debate no pleno de onte para ratificar as alegacións, o voceiro socialista, Óscar Vilar, propoñía que o Concello “lle fixese caso ao recurso” presentado por AGESAF, suspendese a licitación do contrato e incrementase as partidas económicas que figuran nos pregos.
Manuel Taboada recordoulle que os prezos establecidos nos pregos “son os que figuran no convenio colectivo, e que se tivo en contra a subida do IPC ata o ano 2022. As condicións económicas non están mal, tal vez por iso houbo 10 empresas que presentaron as súas ofertas”. O alcalde recordou que mentres no Pino o recurso o presentou AGESAF, no caso de Coristanco e Vimianzo foron os sindicatos os que recorreron. “En ambos casos, o tribunal deulle a razón ao concello, e penso que aquí vai pasar o mesmo.
Nas votacións, aínda que os tres grupos apoiaron a suspensión cautelar do proceso de licitación que solicitaba o tribunal, a hora de ratificar as alegacións do Concello presentadas no procedemento tan só os cinco concelleiros do PP presentes votaron a favor das mesmas. O PSdeG votou en contra (3 votos) e o BNG (2) abstívose, polo que as alegacións quedaron ratificadas.
Contrato por máis de 470.000 euros anuais
A licitación do Servizo de Axuda no Fogar foi aprobada no Pleno do 13 de decembro, cos votos a favor de PP (6) e BNG (1) e a abstención do PSdeG (2).
O Concello do Pino reserva unha partida de 472.595,90 euros anuais para 21.899 horas de atención. Dende unha perspectiva integral e normalizadora, o obxectivo é prestar atención no domicilio daquelas persoas que teñen dereito ao servizo para que poidan seguir vivindo na súa contorna.
Cando o Tribunal notificou o recurso e ordenou a suspensión cautelar do procedemento, xa rematada o prazo dado as empresas para presentar as súas propostas económicas. Segundo dixo Manuel Taboada, hai 10 empresas interesadas en prestar este servizo no Pino.
