O acto desenvolverase este mércores no centro sociocultural Luis Seoane e haberá lectura do manifesto ||
O Concello reivindica con este xesto a aquelas mulleres que o 8 de marzo de 1857 se botaron á rúa para loitar polos seus dereitos ||
O alumnado do CPI Camiño de Santiago participará ao longo deste mes de marzo na actividade de ‘Xogos e xoguetes tradicionais igualitarios’ ||
O programa do 8M inclúe unha campaña de sensibilización do comercio local ||
O Concello de O Pino conmemorará este mércores, 8 de marzo, o Día Internacional da Muller con varios actos que buscan concienciar e visibilizar a loita das mulleres pola igualdade. Lectura do manifesto, campaña de sensibilización do comercio local e a actividade de Xogos e xoguetes tradicionais igualitarios para o alumnado do CPI Camiño de Santiago conforman a programación do 8M que este ano ten como símbolo no Pino unha porta violeta. Unha porta coa que o Concello quere lembrar o significado desta data e recordar a aquelas mulleres que o 8 de marzo de 1857 abriron a primeira porta botándose ás rúas para loitar polos seus dereitos.
O acto institucional terá lugar este mércores ás 13.00 horas no centro sociocultural Luis Seoane e contará coa presenza do alcalde, Manuel Taboada Vigo, e coa xefa territorial da Coruña da Consellería de Promoción do Emprego e Igualdade, Judit Fontela Baró. Alí procederase a instalar unha porta de madeira de cor violeta e terá lugar a súa apertura simbólica. Tras este acto, procederase á lectura do manifesto. Unha vez rematado este acto, a porta de madeira trasladarase ao departamento de Servizos Sociais onde quedará permanente instalada como símbolo do 8M e do camiño emprendido polas mulleres hai 166 anos naquela primeira manifestación na loita polos dereitos femininos.
Enmarcado tamén na programación do 8M, o Concello de O Pino está a desenvolver unha campaña de sensibilización do comercio local. Esta campaña consiste no reparto de carteis co símbolo deste ano, a porta violeta, que quedarán expostos nos comercios e locais para visibilizar esta data e concienciar á cidadanía no longo camiño que queda por percorrer para lograr unha igualdade real e efectiva, para a eliminación de sexismos e para erradicar a violencia de xénero. Xunto cos carteis os establecementos tamén recibirán chapas, adhesivos e unha alfombra malva coa que o Concello quere facer visible o compromiso da cidadanía do Pino con esta arela colectiva.
Finalmente, ao longo deste mes de marzo o alumnado do CPI Camiño de Santiago participará na actividade de Xogos e xoguetes tradicionais igualitarios. A proposta forma parte do programa do 8M deseñado polo Concello. A actividade ten e por obxecto recuperar xogos tradicionais como as canecas ou o brilé e que os nenos e as nenas xoguen en igualdade de condicións, sen sexismos. Desenvolverase nas instalacións educativas e está dirixida a todo o alumnado do centro (infantil, primaria e ESO).
A programación do 8M do Concello do Pino forma parte dos eixos e liñas establecidas no Pacto de Estado contra a violencia de xénero, financiado polo Ministerio de Igualdade.
