Unhas 900 persoas aplaudiron as catro persoas homenaxeadas, que teñen entre 93 e 94 anos ||
Ao xantar celebrado na área recreativa da Madalena asistiu tamén o Director xeral de Maiores, Antón Acevedo ||
O concerto da Banda de Música de Arca abriu os actos oficiais e o dúo Eva e Camilo encargouse de animar a sobremesa cun concorrido baile ||
As catro persoas homenaxeadas coas autoridades. Pola esquerda: Perfecto López Brea, Carmen Vázquez Castro, Alicia Tato Martínez e Jesús Salvado Vigo
Dous homes e dúas mulleres nados entre 1931 e 1932 nas parroquias de Lardeiros, Cerceda e Budiño foron hoxe os protagonistas da XXVII Xuntanza dos Nosos Maiores que o Concello do Pino celebrou na área recreativa da Madalena pare recoñecer e agradecer o traballo que desenvolveron durante toda a súa vida. Antes do xantar e confraternidade, ao que asistiron 900 persoas, o alcalde, Manuel Taboada, o director xeral de Maiores, Antón Acevedo; e concelleiros do equipo de goberno entregáronlles sendos recoñecementos a cada unha das persoas homenaxeadas.
Nesta edición, as placas conmemorativas e os recoñecementos foron para Perfecto López Brea, natural de Lardeiros e que fixo 94 anos o pasado 13 de maio; para Carmen Vázquez Castro, que naceu en Lardeiros o 29 e xullo de 1931 (fai 94 anos dentro de dúas semanas); Alicia Tato Martínez, nada en Cerceda hai 93 anos (celebrou o aniversario o pasado 7 de maio); e para Jesús Salvado Vigo, que naceu en Budiño o 31 de xullo de 1932. Todos eles recibiron un agarimoso aplausos de todas as persoas asistentes á festa.
A área recreativa da Madalena volveu ser o escenario destas tradicional xuntanza, que volveu xuntar a unhas 900 persoas do municipio maiores de 60 anos. O programa comezou co concerto da Banda de Música de Arca, dirixida por Andrés Pérez, e a misa ao aire libre oficiada polo cura de Castrofeito, José Antonio Conde.
O alcalde, Manuel Taboada, destacou na súa intervención o “traballo e a dedicación das catro persoas homenaxeadas, imprescindible para sacar adiante as súas familias e as súas explotacións gandeiras e agrícolas, que axudaron a que O Pino puidese prosperar ata converterse no que hoxe coñecemos todos”. Taboada rematou lembrando que a Xuntanza dos Maiores “quere ser un agradecemento e un recoñecemento a todo o que conseguistes con tanto sacrificio”.
O restaurante Casa Taboada foi o encargado de preparar o menú, composto por empanada, sardiñas, polbo e carne ó caldeiro, co que as persoas asistentes puideron repoñer forzas antes dunha animada sobremesa, na que unhas conversaron animadamente, outras xogaron unha partida de cartas e outras moitas animáronse a bailar ao ritmo da música do dúo Eva e Camilo.
