A cativada poderá aprender a facer un canón de confeti e adornos navideños //
O sábado haberá sesión de títeres co Apalpador como protagonista //
As persoas adultas poderán participar nun encontro de calceta e ganchillo e nun taller de macramé //
O domingo acenderase a árbore do Concello con chocolatada e as panxoliñas do grupo Os Viqueiras //
O Pino recibe o Nadal esta fin de semana cunha gran festa para todos os públicos que se celebrará nunha carpa cuberta fronte ao Concello e contará con xogos tradicionais, obradoiros, un encontro de calceta e ganchillo, unha sesión de títeres ou música.
A III Festa do Nadal do Pino desenvolverase este sábado e domingo. Ámbolos días, dende as catro ata as sete da tarde, a rapazada poderá gozar de diferentes xogos e de globoflexia. Ademais poderá aprender a facer un canón de confeti e adornos para a árbore de Nadal en senllos obradoiros programados para o sábado e o domingo. Como fin de festa, ás 19.30 horas, o primeiro día terán flocos de millos para asistir á sesión de títeres O Apalpador e a nena sen medo a cargo de A Xanela do Maxín e para o segundo está programado o encendido da árbore de Nadal do Concello. Haberá chocolatada, churros e panxoliñas da man do grupo Os Viqueiras.
As persoas adultas, pola súa parte, teñen o sábado unha Quedada Tecedora para reunir aos amantes da calceta e do ganchillo arredor dunha taza de café e uns contos, mentres que o domingo poderán participar nun obradoiro de macramé. Este último ten un custo de 25 euros e límite de prazas, polo que é necesaria inscrición chamando ao teléfono 981 511 065 ou mandando un mail a cultura@opino.gal.
Nadal benéfico
O Pino celebra tamén nestas datas o seu oitavo Nadal Benéfico co obxectivo de axudar as familias máis vulnerables do municipio. Entre o 1 de decembro e o 31 de xaneiro, todas aquelas persoas que queiran colaborar poden deixar alimentos non perecedoiros e produtos de hixiene persoal e de limpeza no centro sociocultural Luis Seoane e os supermercados Dia, Eroski e Onda.
O departamento de Servizos Sociais do Concello irá repartindo ao longo do ano todos os artigos que se recollan entre aquelas familias que máis o necesiten.
