O concello de O Pino venlle de solicitar ao Ministerio de Fomento que asuma as obras de ampliación e mellora do firme da estrada local que sirve de saída 77 da autovía Santiago-Arzúa (A-54) cara Cerceda e Touro. “O firme está tan deteriorado que en algún tramo destes 1.200 metros que unen a autovía coa N-547 non caben un camión e un turismo”, asegura o alcalde de O Pino, Manuel Taboada, amosando un informe de seguridade viaria feito pola Garda Civil de Tráfico e que tamén se remitiu a Fomento. O pleno da Corporación, aprobou por unanimidade esta semana solicitarlle ao Ministerio o arranxo desta estrada local.
Manuel Taboada recorda que esta estrada de competencia municipal e moi utilizada polos vehículos pesados que van cara a Touro. “Xa durante as obras da autovía, os camións que transportaban os áridos para a autovía utilizaban este vial, polo que o firme en moitos puntos está totalmente desfeito”, asegura Taboada Vigo. En algúns tramos, a calzada apenas ten 4 metros de ancho, polo que cando se cruzan dous vehículos prodúcense situacións de perigo.
O Concello pediulle un informe de seguridade viaria á Garda Civil de Tráfico, no que se asegura que o ancho medio da calzada é de 4,8 metros, e nas veiras está moi deteriorado, sobre todo na zona máis próxima a autovía. “Segundo recolle a Garda Civil hai puntos nos que non cabe un camión e un turismo, e un dos dous ten que botarse á beiravía”, indica Taboada.
Parte do deterioro desta vía, débese a que durante a execución da A-54, a altura da actual rotonda, estaba situada a planta de concentración de áridos de toda a autovía, polo que o tráfico de camións foi moi intenso durante o tempo que duraron aas obras, o que provocou o deterioro desta estrada local que agora dende o Concello solicitan que arranxe Fomento.
Nunha recente reunión co xefe de Estradas do Estado en Galicia, dependente do Ministerio de Fomento, Ángel González del Río, o alcalde de O Pino entregoulle un proxecto feito polo Concello de O Pino, que ascende a 106.271,29 euros e que permitiría ampliar 0,75 centímetro cada beiravía desta estrada, e votar unha nova capa de aglomerado, para facer unha plataforma de, polo menos, 5,5 metros de ancho que mellore a seguridade viaria.
“A mellora dos enlaces de entrada e saída da autovía coa nacional N-547 fixémoslla dende o Concello tanto ao Ministerio de Fomento como a empresa adxudicataria durante as obras da autovía”, sinala Taboada, quen considera que “non debe ser o Concello o que teña que asumir a mellora dos accesos a autovía”.
Algúns veciños de Cerceda tamén se queixan do incremento de tráfico, coa presencia de moitos camións, nesta pista. “A estrada é tan estreita que non cabe un coche e un camión, e temos medo de que haxa algún atropelo. É preciso ampliar o ancho desta estrada para garantir a seguridade viaria”, indican os veciños, que recordan como moitas veces, no cruce da N-547 con esta estrada local se producen atascos cando un camión tenta saír ou entrar e non deixa espazo para outros vehículos.
Recomendan a saída de Pedrouzo ou a de Lavacolla
Dende o Concello, Manuel Taboada recoméndalle aos condutores que se dirixan a Touro que tomen a saída 80 da autovía, a que pasa por Pedrouzo, ou a saída 84, na antiga rotonda de Lavacolla, e que vaian pola N-547 ata o cruce de Santa Irene.
“Estas dúas saída son máis anchas e permiten a circulación sen problemas”, sinala Manuel Taboada, quen recoñece que a estrada local da saída 77 ata Cerceda é moi estreita e supón un perigo para a circulación, polo menos ata que Fomento acometa as necesarias obras de mellora.
Saída da Salceda tamén estreita
De feito, o Concello de O Pino vai investir 80.000 euros para acondicionar e asfaltar unha pista forestal para que aqueles vehículos que saían da autovía A-54 cara Salceda vaian ata a estrada que une Boavista (O Pino) e Dodro (Arzúa).
“Temos que quitar o tráfico da aldea da Salceda, porque esta estrada local ten uns 3 metros de ancho entre as casas, e non caben dous coches. Xa houbo accidentes polo estreito deste tramo e algún camión quedou atascado. Ademais, nesta zona pasa o Camiño de Santiago”, sinala o alcalde, quen adianta que a intención do Concello é deixar a pista da Salceda para o tráfico local e desviar o tráfico de saída da autovía pola outra pista forestal que van arranxar entre este mes e principios de novembro, porque a obra xa está adxudicada.
“Non é normal que dende Fomento se pretenda transferir aos concellos o arranxos das pistas locais de acceso á autovía, en vez de incluír estas melloras no proxecto da obra”.
O Concello de O Pino xa lle reclamou ao Ministerio de Fomento o arranxo das vías de servizo que van paralelas a autovía A-54 para mellorar a seguridade viaria e non masificar as estradas locais que actualmente se usan como saída e entrada da autovía. Ata o momento, Fomento só se comprometeu a asfaltar os viais paralelos a autovía a altura da rotonda de Lavacolla e que beneficia aos veciños de Castrofeito.
