Teatro e gastronomía irán da man este sábado en Arca. Deste xeito inicia o Concello do Pino a programación do V Nadal Benéfico, no que se ofrece a todos os asistentes a posibilidades de colaborar coas familias con menos recursos do municipio. Dende as seis e media da tarde, o Club de Maiores de Boqueixón representará a obra ‘Urxencias’, na que se amosa o día a día dunha sala de urxencias dun hospital moi particular, na que o persoal médico e sanitario deberá tratar a pacientes do máis variado.
E despois de tanto trafego polas urxencias que ocorran sobre o escenario, que mellor que repoñer forzas cun caldo quente de galiña piñeira. O sábado tamén chega a Arca o Itinerario Gastronómico do Camiño Francés, promovido pola Mancomunidade de Municipios Galegos do Camiño Francés e no que participa o Concello do Pino. ‘Con caldo, pan e viño… faise o Camiño’ é o lema elixido este ano para esta ruta gastronómica que percorre os diferentes municipios do Camiño Francés en Galicia, e que este sábado rematará no Pino coa degustación de caldo de galiña piñeira.
E todos aqueles veciños e visitantes que se acheguen a ver a obra de teatro ou a participar na degustación de caldo poderán participar tamén na quinta edición do Nadal Benéfico que, coma todos os anos, organiza o Concello para recoller produtos de primeira necesidade que, durante o resto do ano, se reparten entre as familias con menos recursos. No centro sociocultural Luis Seoane poderán depositarse alimentos non perecedoiros, produtos de limpeza ou de hixiene persoal. O Concello manterá a recollida ata o sábado 1 de febreiro de 2019, polo que todas as persoas que queiran colaboran teñen dous meses para facelo. A partir de febreiro, e durante o resto do ano, estes produtos iranse distribuíndo entre as familias do municipio con menos recursos.
A programación de Nadal continuará o 22 de decembro con actividades para persoas de todas as idades. No polideportivo municipal de Reboredo, a partir das 16.30 horas, organizaranse xogos e actividades para os máis pequerrechos, como xogos con paracaídas, carreiras, batalla de globos ou un obradoiro de maquillaxe.
Ás sete da tarde, os participantes poderán degustar, na casa de cultura, unha excelente chocolatada e, dende as oito, asistir ao cine, para gozar coa proxección da película ‘Pérez, o ratiño dos meus soños’. Estas actividades son gratuítas para todos os que se apunten antes do 19 de decembro.
O último sábado do ano, 29 de decembro, a Banda de Música de Arca ofrecerá o xa tradicional concerto de Nadal, e o 5 de xaneiro celebrarase a Cabalgata de Reis, na que os magos de Oriente percorrerán todas as parroquias do Concello antes de falar cos máis pequenos no polideportivo de Reboredo.
