O Concello celebra a apertura dun novo espazo cultural dedicado á música||
O goberno local con este emotivo acto o legado dun dos membros máis activos e lonxevos da Banda de Arca ||
O alcalde do Pino, Manuel Taboada, inaugurou este sábado 22 de xuño a Casa da música Manuel Barreiro Mosquera, un novo espazo que será utilizado pola Banda de Música como local de ensaio e de formación. O edificio leva o nome de Manuel Barreiro, coñecido como O Padriño entre os músicos, quen aos seus 90 anos e leva máis de medio século tocando o clarinete e o requinto na Banda de Arca. Con esta homenaxe o Concello reafirma o seu compromiso coa agrupación e co desenvolvemento cultural da comunidade.
A inauguración contou coa presenza, ademais do alcalde e do homenaxeado, da presidenta da Asociación Cultural Banda de Música de Arca, Antía Cores; do seu director, Andrés Pérez, e de numerosos veciños e veciñas. “Desde o Concello queremos ofrecer instalacións onde poidan seguir cultivando o amor pola música entre a mocidade do Pino e de toda a comarca”, destacou o rexedor.
O local que alberga a Casa da música sempre tivo un vínculo coa educación, primeiro como escola unitaria e logo como punto de atención á infancia. Agora, converterase nun centro cultural cedido á banda para os seus ensaios e para seguir formando e iniciando na música a futuras xeracións.
No marco desta inauguración, o Concello de O Pino rendeu unha homenaxe a Manuel Barreiro Mosquera, coñecido como O Padriño. Vinculada á Banda de Música de Arca de xeito ininterrompido dende 1970, Manuel foi un exemplo de dedicación e paixón pola música. “Foi, e segue sendo, un piar da banda, un exemplo para novos e veteranos. A súa vitalidade e carácter afable son admirados por todos, xa que leva a música no seu sangue, no seu ADN”, subliñou Manuel Taboada.
Nado o 8 de setembro de 1933, O Padriño comezou a súa traxectoria musical aos 14 anos na Banda da Grabanxa, pasando polas Bandas de Senra e Arzúa antes de unirse á Banda de Música de Arca en 1970. Non só destacou como músico tocando o clarinete e o requinto, senón tamén polo seu papel na incorporación de novos membros, incluídos os seus propios fillos e outros veciños.
Nos 54 anos que O Padriño leva na Banda de Arca, estivo sempre atento a batuta de varios directores: Benito Iglesias, Rosendo Mato, Xavier Ces, Ramón Vigo, José María Blanco e tamén do actual, Andrés Pérez. Nos seus primeiros anos na banda, incluso lle tocou en algunha ocasión exercer de director.
Para honrar o seu legado, o alcalde Manuel Taboada desvelou a sorpresa da mañá: “Por toda esa paixón e amor pola música que transmites a todos os que te coñecen, no Concello de O Pino queremos que este local leve sempre o teu nome. Por iso chamámolo Casa da música Manuel Barreiro Mosquera“.
Aínda que o Concello contaba coa complicidade da familia, Manuel descoñecía a nova polo que a emoción no seu rostro foi palpable. O Padriño agradeceu o xesto cunha intervención chea de humor aínda que confesara “que o de falar non é o meu”.
Tras descubrir a placa que dende hoxe loce á entrada da Casa da Música e do intercambio de agasallos, a Banda de Arca tocou varias pezas entre as que non faltaron o himno galego.
A xornada rematou ao redor da mesa cun xantar cheo de risas, de recordos e de moita ledicia.
Esta inauguración marca un novo capítulo na historia cultural do Pino, consolidando o compromiso do municipio coa música e a formación de novos talentos, ao tempo que recoñece o inmenso aporte de Manuel Barreiro Mosquera O Padriño á comunidade.
Podes ver o album de fotos na páxina oficial de Facebook do Concello do Pino, neste enlace.
