A partida do POS+ Adicional repártese en 53.000 € para o servizo de axuda a domicilio, 27.000 € para reforzo de persoal e 3.000 € para emerxencia social ||
A Corporación aproba tamén por unanimidade as obras do Plan Complementario, que ascenden a 437.000 euros ||
Dos 365.000 euros do POS+ destinaranse 127.000 a obras de mellora da seguridade viaria, do cemiterio de Arca á rúa Codesal e da N-547 a San Antón ||
O Pleno do Concello do Pino aprobou esta mañá por unanimidade incluír no Plan único de concellos POS+ 2022 as obras de mellora da seguridade viaria do cemiterio de Arca á rúa Codesal e da N-547 a San Antón, por un importe total de 126.943 euros. Os outros 237.876 euros do POS+ 2022 destinaranse a gastos correntes. Na partida de servizos sociais inclúense 83.000 €, mentres que no Plan Complementario se contemplan 436.766 € para obras.
A partida de investimentos do Plan único de concellos repártese en dúas obras de mellora viaria. A primeira delas, entre o cemiterio de Arca e a rúa Codesal, servirá para enlazar dúas sendas xa existentes: a do cemiterio e a da rúa da Casilla, de xeito que formen un anel continuo. A Deputación destinará 59.298 euros e o Concello de O Pino achegará 3.141 euros. No segundo caso, correspondente á mellora da seguridade viaria da N-547 a San Antón, o organismo provincial investirá 59.298 € e o Concello 5.205 €. Consiste na mellora da plataforma da estrada e na construción dunha senda peonil pola marxe dereita que “beneficiará a seguridade dos peregrinos que se incorporan ao Camiño de Santiago neste punto como inicio de etapa”, segundo explicou o alcalde do Pino, Manuel Taboada.
A Corporación aprobou tamén por unanimidade as obras que figuran no Plan Complementario 2022, que ascenden a un total de 436.766 euros. Neste apartado inclúese a mellora da seguridade viaria de San Antón ao campo de fútbol de Reboredo (190.294 €), coa construción dunha senda peonil pola marxe dereita ata o colexio. Na parroquia de Medín, habilitaranse beirarrúas na entrada da Torre ata a Igrexa e rematarase o acondicionamento do campo da festa, mellorando a capa do piso xa pavimentado e executando a parte que aínda non o está (119.674 €). O módulo exterior de atletismo e a mellora do acceso ao campo de fútbol de Vilaboa ten asignado un orzamento de 85.154 €. Por último, 41.642 € destinaranse á reparación da pista que vai do punto limpo ao paso superior da autovía pasando pola aldea de Pazos.
Outro dos puntos debatidos na sesión plenaria de hoxe foi a distribución dos 83.256 euros do POS+ Adicional para financiamento de gastos sociais extraordinarios. A proposta da alcaldía, que foi aprobada por unanimidade, contempla destinar 53.418 € a ampliar o servizo de axuda a domicilio; 26.838 € a reforzar o persoal adscrito aos servizos sociais municipais; e 3.000€ para axudas de emerxencia ás persoas ou familias en risco de exclusión social.
