Preto de 30 nenos e nenas participan nas actividades lúdico-educativas que se realizan no pavillón municipal de Reboredo //
Vinte e nove nenos e nenas gozan nestes días do campamento organizado polo Concello de O Pino para facilitar a conciliación nas xornadas de Semana Santa que son festivas para a cativada, pero non para as familias. Entre o luns 11 e o mércores 13, e tamén o próximo luns 18, practicarán deporte, realizarán actividades educativas e aprenderán contidos transversais no pavillón municipal de Reboredo, a carón do CPI Camiño de Santiago.
Monitorado da empresa SIF Servicios Integrales de Formación encárgase de levar a cabo o campamento Lecer Semana Santa, que está aberto entre as 8:30 e as 14:30 horas. As idades dos asistentes van dos tres aos doce anos, e as actividades propostas adáptanse aos seus intereses e capacidades. Así, despois da xornada de presentación do luns, están a realizar manualidades relacionadas con estas datas, como ovos de Pascua, e a participaren en actividades lúdicas como un animado karaoke. Tamén se traballa desde o xogo e a arte en contidos coma a pirámide alimentaria, os hábitos de vida saudable ou a igualdade. Estas actividades compaxínanse coa práctica de deportes e xogos diversos, aproveitando as instalacións do polideportivo municipal.
O Concello de O Pino busca con este campamento ofrecerlles ás familias unha alternativa de conciliación saudable, entretida e que achegue contidos educativos aos nenos e ás nenas. O custo de Lecer Semana Santa é de 10 euros polos catro días e as familias numerosas gozan dun desconto do 20% a partir do segundo fillo. Na actividade, ademais de estaren atendidos e ao coidado de profesionais, poden desenvolver as súas capacidades artísticas e os seus intereses, aprendendo a través da convivencia e do xogo.
