A xornada contou coa presenza do alcalde, Manuel Taboada, e dos concelleiros José Fuentes e Borja Castro || Inchables, espectáculos e un mural colaborativo puxeron o broche final á Escola de Verán e a Viaxando coa cativada ||
O Concello do Pino celebrou hoxe, venres 5 de setembro, a festa de clausura da Escola de Verán nas instalacións exteriores do CPI Camiño de Santiago. O acto contou coa presenza do alcalde, Manuel Taboada, e dos concelleiros José Fuentes e Borja Castro, que compartiron cos nenos e coas familias unha xornada marcada pola alegría e a creatividade.
A festa foi o punto final non só da Escola de Verán, senón tamén do programa Viaxando coa cativada, iniciativas que durante estes meses ofreceron alternativas de lecer e de conciliación para numerosas familias do municipio. Os máis pequenos gozaron dunha tarde chea de enerxía nos inchables e tiveron a oportunidade de mergullarse no espectáculo Os ourizos, un conto de corresponsabilidade que fixo reflexionar a público de todas as idades.
As familias participantes tamén puideron descubrir, a través da decoración, o traballo e as creacións realizadas polos seus fillos ao longo do verán. Como colofón, nenos e maiores participaron na elaboración dun mural colaborativo que tiña como fío condutor a corresponsabilidade. A clausura converteuse así nun momento de encontro e celebración que deixou tras de si recordos, amizades e experiencias que acompañarán ás familias ata o vindeiro verán.
