Tralo éxito da primeira edición, a xornada repítese cun amplo programa de actividades ||
Os espectáculos de música, teatro e maxia amenizarán a festa que se pechará cun concerto de Mamá Cabra ||
A área recreativa da Magdalena, en Castrofeito, acolle o sábado 9 de setembro a segunda edición da festa da familia O Papaventos organizada polo Concello do Pino.
Tralo éxito do pasado ano, a xornada repítese co obxectivo de que pequenos e maiores compartan xogos e obradoiros así como actuacións de teatro, de maxia e de música. O fin de festa correrá a cargo do grupo Mamá Cabra.
A xornada incluirá espazos lúdicos no que poderán participar todas as familias.
Xunto ás diferentes actividades e propostas serán varios os espectáculos de teatro e de música que pecharán esta cita no Concello do Pino.
Así, Troula Animación traerá o Show de Fifo: Soño e Dani García abraiará á rapazada e aos maiores con Galdaka, a maxia detrás do cristal.
Inventi Teatro porá en escena A Tropa do Doutor Milagre e a xornada de festa, xogos, diversión e convivencia pecharase co concerto de Mamá Cabra.
