O envellecemento saudable, a criminoloxía e a escrita da nosa historia centran os cinco seminarios // Os participantes no ciclo visitarán a facultade de Medicina //
O programa da USC Camiños de coñecemento e experiencia regresa en maio ao Concello do Pino para ofrecerlles formación universitaria ás persoas maiores de 50 anos. O centro sociocultural Luis Seoane acollerá cinco xornadas formativas sobre diversos temas culturais e científicos. Ademais, realizarase unha visita á facultade de Medicina compostelá.
O ciclo ábrese o mércores 18 de maio cun seminario sobre envellecemento saudable, a cargo do doutor Víctor M. Arce Vázquez. Ao día seguinte, os participantes no programa visitarán a facultade de Medicina acompañados polo médico de familia e profesor José Manuel Fernández García.
A criminóloga e investigadora da facultade de Ciencias Políticas Ana Moure Soengas será a encargada dos relatorios dos días 23 e 24 de maio, sobre introdución á criminoloxía e a análise de pegadas dixitais, respectivamente.
O ciclo continuará o día 30 cun seminario a cargo do doutor en Historia Anxo Rodríguez Lemos sobre os instrumentos e soportes de escritura empregados na historia de Galicia e pecharase o martes 31 de maio cunha sesión práctica de achegamento a materiais arqueolóxicos e documentais.
A matrícula neste programa formativo é gratuíta. As inscricións realizaranse no departamento de Servizos Sociais do Concello de O Pino, en horario de 8.30 a 14.30. Os seminarios desenvolveranse en horario de tarde, de 16.30 a 18.00 horas.
Camiños de coñecemento e experiencia forma parte do IV Ciclo Universitario da Universidade de Santiago, entidade que organiza o programa co apoio da Xunta de Galicia e da Deputación da Coruña. Na edición de 2022 participan os concellos do Pino, Lousame, Arzúa, Boqueixón, Porto do Son, Melide, Muros, Noia, Padrón, A Pobra do Caramiñal, Rianxo, Ribeira, Teo, Vedra, Ordes e Outes.
