As sesións serán nos locais sociais das parroquias de Ferreiros e Lardeiros ||
A primeira terá lugar o luns 16 de xuño e a segunda o xoves 26 de xuño, en horario de 19:30 horas ||
O Concello do Pino acollerá durante o mes de xuño dúas charlas enmarcadas no Plan Maior Seguridade, unha iniciativa que ofrece información e consellos prácticos á poboación maior co fin de previr situacións de risco.
As sesións celebraranse nos locais sociais das parroquias de Ferreiros e Lardeiros. A primeira delas terá lugar o luns 16 de xuño ás 19:30 horas en Ferreiros, mentres que a segunda será o xoves 26 de xuño, tamén ás 19:30 horas, en Lardeiros.
Durante os encontros, persoal da Garda Civil abordará cuestións como os riscos no fogar, estafas, roubos, accidentes na vía pública ou situacións de posible maltrato ou abandono. O obxectivo principal é mellorar a seguridade das persoas maiores a través da información e a prevención.
A entrada é gratuíta e non require inscrición.
O programa Plan Maior Seguridade desenvolve actividades por todo o territorio co obxectivo de fomentar o benestar e a protección da poboación maior, un colectivo especialmente vulnerable ante determinados delitos ou riscos cotiáns.
