A compañía aAntena traerá esta semana ao Pino a representación teatral de Relato para un incendio, unha proposta que parte da realidade máis próxima para poñer en valor a identidade e a tradición galegas. A obra vai dirixida a público adulto e poñerase en escena o venres 10 de marzo no centro sociocultural Luis Seoane a partir das 20.00 horas. Esta actividade enmárcanse no proxecto A ollada de Gustav, que recupera a historia de Gustav Henningsen, o danés que percorreu Galicia en 1965 realizando unha completa colleita etnográfica e antropolóxica.
Dous sucesos verídicos, como son os incendios provocados por unha veciña na comarca de Ordes no verán de 2016 e os estudos de Gustav Henningsen na procura dos últimos vestixios de bruxería en Galicia, son o punto de partida de Relato para un incendio. O texto de Ernesto Is conecta estes dous feitos a modo de teatro documento, con dirección de Xosé Leis e interpretacións de Isabel Risco, Victoria Pérez e Manu Fernández. Esta coproducción de aAntena, o Centro Dramático Galego e a MiT Ribadavia poderá verse o venres 10 de marzo ás 20.00 horas no centro sociocultural Luis Seoane. A entrada é gratuíta.
A recuperación do patrimonio invisible de Galicia e a consecución da igualdade están presentes nas creacións artísticas da compañía aAntena, que desta volta se pon á fronte dun proxecto de dinamización do medio rural a través da cultura. O Concello de O Pino foi un dos 13 municipios galegos seleccionados para a posta en marcha da Ollada de Gustav, proxecto favorecido na convocatoria de axudas Territorio Cultura da Xunta de Galicia ao abeiro dos fondos Next Generation da UE.
A ollada de Gustav trata de dar a coñecer, conxugando pasado e presente, os traballos do antropólogo e folclorista danés Gustav Henningsen, quen no ano 1965 e enviado por Julio Caro Baroja, visitou Galicia para facer un estudio etnográfico sobre as crenzas arredor da bruxería na nosa comunidade. Ao longo de 20 meses, o investigador desenvolveu un intenso traballo de campo por toda Galicia, deténdose de xeito especial na comarca de Ordes.
