O centro sociocultural Luis Seoane acolle dende este luns e por un período de 10 días a mostra Á violencia de xénero… dille NON!, unha iniciativa da Secretaría Xeral de Igualdade da Xunta que ten como obxectivo impulsar a sensibilización e prevención da violencia de xénero entre a mocidade.
Trátase dunha exposición gráfica ilustrada, dirixida a axudar aos adolescentes a recoñecer, identificar e rexeitar condutas sexistas, nocivas nas súas relacións. Once paneis, de 70 x 100 centímetros, amosan condutas tóxicas como o control, a manipulación, o abuso, a “sextorsión”, a chantaxe emocional e outras formas de maltrato.
Á violencia de xénero… dille NON! inscríbese no conxunto de actuacións que está impulsando a Xunta de Galicia nos 78 concellos adheridos á Rede de entidades locais contra a violencia de xénero. Pode visitarse no centro sociocultural Luis Seoane en horario de mañá, de 10.00 a 14.00 h; e tamén de mércores a venres entre as 16.30 e as 19.30 horas.
