O Concello de O Pino abre mañá, 30 de setembro, o prazo de inscrición para participar nas escolas deportivas municipais (dirixidas aos escolares) e nas actividades deportivas para adultos, que se van desenvolver nos polideportivo de Reboredo (Arca) e Lameiro, e no centro sociocultural Luis Seoane. Debido a pandemia da covid-19, todas as persoas participantes terán que comprometerse a respectar e cumprir o protocolo municipal elaborado para previr a propagación da covid-19.
As actividades grupais desenvolveranse sempre en grupos reducidos, que serán de 12 persoas por clase, no caso das escolas deportivas municipais; de 25 nas actividades para adultos que se celebren nos polideportivos municipais, e de 10 persoas por grupo nas que se realicen na casa da cultura.
Tanto as escolas deportivas como as actividades para adultos desenvolveranse entre o 1 de outubro e o 31 de maio de 2021.
No caso das escolas deportivas o prezo anual da actividade é de 40 euros, que se deberán pagar no momento de facer a inscrición. Hai descontos establecidos no caso dun segundo irmán ou irmá e ou para os demais membros da unidade familiar (50%). Se un escolar participa en máis de dúas actividades, terá tamén un desconto do 50% na segunda e seguintes.
No caso de menores de 16 anos que non estean empadroados no Concello de O Pino, o prezo das escolas deportivas é de 60 euros anuais, aplicándose os mesmos descontos.
As actividades que se ofertan son atletismo, ximnasia rítmica, patinaxe artístico e de iniciación, fútbol sala e bádminton.
Actividades para adultos
No caso das actividades deportivas para adultos (maiores de 16 anos), o prezo é de 55 euros anuais por actividade (que tamén se aboará integramente coa inscrición). Hai un desconto do 50% a partir da primeira para quen se matricule en varias actividades.
No caso de persoas non empadroadas no Pino, a taxa é de 75 euros anuais, cos mesmos descontos.
Ximnasia de mantemento, ioga, running, GAP e circuíto de forma, aerobic/step, tenis, pilates e zumba son as disciplinas que este ano se poden practicar no Pino.
Fichas de inscrición, de pago e protocolo covid-19
Os documentos para anotarse (folla de inscrición, carga de pago, protocolo covid-19 e listado de actividades) pódese descargar nos seguintes enlaces, e deberá presentarse cuberto no rexistro municipal de 10.00 a 14.00 horas.
Inscrición Escolas deportivas municipais 2020-21
Inscrición actividades deportivas adultos 2020-21
Documento de pago
Programación actividades deportivas adultos 2020-21
Programación escolas deportivas municipais 2020-21
